Duolingo

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Duolingo is e computerprogram veur 't liere vaan vreem taole. 't Weurt in 't gemein es app op de smartphone gebruuk, meh is ouch euver vas internèt besjikbaar. 't Program kump oet de Vereinegde Staote, um perceis te zien oet Pittsburg.

Duolingo woort vaan 2009 tot 2011 oontwikkeld. Nao e paar maond in de bètaversie door e beperk pebliek te zien gebruuk, woort 't program op 19 juli 2012 vrijgegeve veur 't pebliek. Allewijl (2025) is 't besjikbaar in tientalle taole. De mieste cursusse weure allein aongeboje vaanoet 't Ingels; vaanoet 't Nederlands zien cursusse Ingels, Spaons, Frans, Duits, Italiaons en Chinees (Mandarijn) besjikbaar. Catalaons, Guarani en Kantonees zien de insegste twie taole die neet in 't Ingels besjikbaar zien: me moot dao Spaons resp. Mandarijn-Chinees veur kinne. Daoneve gief 't cursusse veur (sumpel) wiskunde en meziek.

Kinmerkend veur de werkwijs vaan Duolingo is de zoegeneumde 'gamificatie': de speuler kin punte verdene door väöl leskes te make, en 'späölt' daomèt ouch in ein vaan de tien devisies. Wijer punte zien te verdene mèt 't hole vaan mijlpaole of door same mèt zien vrun te speule. Späölt me de gratis versie, daan heet me ouch e beperk aontal hertsjes (leves); vief foute beteikent tot me neet wijer kin. In de betaolde versie (Super Duolingo) heet me oonindeg väöl hertsjes; ouch blijf me daan versjoend vaan reclames en krijg me mèt kunsmaotege intelligentie samegestèlde opgaves um zien zwake punte te verbetere.

De mascot vaan Duolingo is de greun ojl Duo; wijer vint me 'n ganse gróp ander personages um häöm heer.