Druze
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Druze (Arabisch: دروز droez; Hebreeuws: דרוזים - droeziem) vörme 'n religieus gemeensjap i g'n Levant, in 't grensgebeed tusje Libanon, Syrië en Israel. Ze hange e geleuf aa wat is vuurtgekoame oet 't ismailisme, 'ne tak binne d'r sjiitische islam en óntsjtóng in d'r 11e ieëw noa Christus es 'n vernuiingsbeweging. Druze besjouwe zichzelf koom es moslim en weëde durch moslims geweunlich ónneet gezieë es moslim. Waal besjouwe ze zichzelf dök es etnische Arabiere en kalle ze de Arabische sjproak. I g'n Levant woeëne óngevier 800.000 bis 1 mieljoeën Druze en wiejer gieëf 't 'n diaspora uuever de ganse welt, mit relatief groeëte gemeensjappe van inkel tieëndoezende luuj in de VS, Canada en Venezuela.
't Druzische geleuf is 'n gnostische beweging, wat wilt zage dat hun lieër geheem is vuur jieëkerinne deë va boete de gemeensjap kunt en anger luuj neet weëde bekierd tot 't druzisme. Trouwe dónt ze dök nog binne de gemeensjap. Druze geleuve in inne God en 't hillig book heesjt Hikme, wat zoeëget betekent wie Book van de Wieshede. Wiejer sjpieële profete, die ooch in d'r Koran geneumd weëde, 'n wichtige rol in 't druzische geleuf, woe-ónger Jezus en Mohammed.
D'r ivlood van 't platonisme zuut me truuk in 't geleuf i reïncarnatie. Dit hingk same mit 't geleuf in 'n sjtrikte dualiteet va zeel en lichaam; de zeel besjteet volges dees ópvatting neet oane 't lichaam en mót dus reïncarnere, dus truukkiere in e nui lichaam. I teëgesjtelling tot beivuurbeeld Aziatische filosofieë en 't boeddhisme geleuve Druze waal dat de miensjliche zeel ummer miensjlich blief en noeëts kent reïncarnere es e bieës en ezoeë blief emes wat i zie of höär leëve druzisch woar ooch ummer druzisch en 'ne man ummer 'ne man.