Curaçaos hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Curaçaos hierevoetbalèlftal vertreujt Curaçao in internationaol voetbalmatche. 't Team is lid vaan de Noord-Amerikaonse fidderatie CONCACAF.

Historie

In 2010 woorte de Nederlandse Antille oontboonde es land. Dit beteikende ouch 't ind vaan 't Nederlands-Antilliaons hierevoetbalèlftal. Veur Curaçao, wat noe e land binnen 't keuninkriek woort, mós noe (zoe good wie veur Sint Maarten) 'n apaart nationaol team koume. Op 20 augustus 2011 waor 't zoewied: toen späölde Curaçao zienen iersten toesmatch ('n 1-0 verlees tege de Dominicaonse Rippubliek).

In de jaore die volgde greujde 't team gestiedegaon. Zoe woort in 2014 veur 't iers mètgedoon aon de Caribbean Cup ('n intössen opgeluf dreijaorleks toernooj). In 2017 wiste ze die zelfs te winne. Datzelfde jaor deeg 't eiland ouch veur 't iers mèt aon de CONCACAF Gold Cup. 't Team raakde good geprofessionaliseerd wie speulers en trainers mèt 'ne band mèt Nederland ziech drin góng minge. Zoe woort Patrick Kluivert in 2015 traineur. Kluivert woort in 2016 opgevolg door Remko Bicentini, 'nen eilender dee väöl jaore in Nederland had doorgebrach. Vaanaof deen tied woorte ummer mie Nederlandse voetballers mèt Curaçaose wortele nao 't nationaol èlftal gehaold. Dit waor belaankriek, zeker ouch umtot op 't eiland voetbal noets zoe leefde wie hoonkbal.

Op 15 jannewarie 2024 kaom Dick Advocaat es traineur nao Curaçao. Dee had al 'ne ganse loupbaon achter ziech, dèks mèt groete successe en boondscoach. 't Lökde häöm veur 't team in korten tied hendeg te professionalisere en tot groete huugde te bringe. Op 18 november 2025 Curaçao veur 'n sensatie wie 't ziech, es winner vaan 'n gróp mèt wijer Jamaica, Trinidad en Tabago en Bermuda, plaotse veur 't WK vaan 2026. Curaçao is veeroet 't kleinste land oets wat dat gelök is.