Charles Eyckpark

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Charles Eyckpark vaan noord nao zuid gezeen. Links zuut me de Stoa, rechs de Maos, op d'n achtergroond 't Bonnefantemuseum en de Kennedeybrögk.
't Park vaanaof Kaffee Zuid.

't Charles Eyckpark is e park aon de Maos in Mestreech, in de De Zjeramiek. 't Is verneump nao de sjèlder en beeldhouwer Charles Eyck.

Ligking[bewirk | brón bewèrke]

't Charles Eyckpark vörmp e smaal, laankgerèk stökske greun wat begint bij de Maospunttorie, neven 't Plein 1992, en doorlöp tot aon 't Bonnefantemuseum. Vaan noord nao zuid löp 't touw in de vörm vaan 'ne toertpunt. Aon de weskant löp de Maos, in 't ooste weurt de grens gevörmp door de Stoa, e laankgerèk appartemintegebouw vaan de Zwitser Luigi Snozzi. 't Perkske is verbooje veur oto's, meh loupers en fietsers kinne wel drin en dedoor. Fietsers gebruke de Maospuntweeg, loupers kinne ouch via de päörtsjes in de Stoa in en oet 't park.

Oontwerp[bewirk | brón bewèrke]

Al kort naotot Jo Coenen belas woort mèt 't oonderwerp vaan de Zjeramiek, veurzaog heer op dit stökske groond e park. Euverweging daobij waor tot 't op dezelfde plaots aon de weskant vaan de Maos ouch e park gief, 't Stadspark. In 't noorde umvat 't park nog zjus de vreuger walmör vaan Wiek. 'ne Viever mèt fonteine gief de ligking daovaan aon; de bloetgelagte fundaminte vaan de vesting zien nog te zien.

't Oontwerp vaan 't park kump vaan de Zweedse landsjapsarsjitek Gunnar Martinsson. Heer beheel de al bestaonde Maospuntweeg mèt zien rei linde. Tege de Stoa bouwde heer 'n betonne pergola-moer. Vaanaof de päörtsjes in de Stoa loupe twie paajer nao de Maos touw, zoetot 't perkske in drei deile weurt verdeild. 't Noordelek deil, 't breidste, besteit veural oet gazon (foto), mèt gans aon de noordkant de geneumde viever en in 't midde e heuvelke mèt buim. In 't middeste deil stoont al 'nen esdore; Martinsson leet dao ouch nui buim en struuk plante. 't Zuielek deil is gooddeils bestraot en deent feitelek es veurplein veur 't Bonnefantemuseum.

Bronne[bewirk | brón bewèrke]

Commons
Commons
In de categorie Charles Eyckpark (Maastricht) van Wikimedia Commons zeen media gerelateerd aan dit óngerwerp te vènje

Dit artikel is gebaseerd op 't corresponderend Nederlandstaoleg artikel, en wel in dees versie.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Charles_Eyckpark&oldid=441079"