Bram Moszkowicz

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Bram en Max Moszkowicz in 1987
't Ketoer vaan de joonge Moszkowitz in Amsterdam.

Bram Moszkowicz (Mestreech, 26 juni 1960) is 'ne Nederlandse politicus en ex-avvekaot vaan juudsen aofkóms. Ziene pa Max Moszkowicz sr. is ouch 'ne bekinde straafpleiter. Moszkowicz woort bekind vaan versjèllende spraokmakende zakes mèt zwoer krimmenele en bekinde publieke figure, zoewie vaan versjèllende tv-optrejjes. In 2012 woort heer oet zien amb gezat naotot heer versjèllende tuchregele mie es eine kier had euvertrooje. In hoeger beroop woort dat royemint bevesteg.

Studie[bewirk | brón bewèrke]

Moszkowicz studeerde rechte in Amsterdam. Heer veel dao neet op door oetzunderlek talent, wel evels door iefer en formeel gedraag. De maan zeet zelf 't mieste te höbbe gelierd vaan ziene pa, nao dee zien pleidoeje heer zoe dèks meugelek kaom luustere.

Loupbaon es (bekinden) avvekaot[bewirk | brón bewèrke]

Moszkowicz oondersjeide ziech door 'n veurleefde veur zake mèt väöl media-aondach, en dao-oet voortkoumend de veurleefde veur bekinde, dèks beröchte cliënte, wie de beroopscriminele Cor van Hout, Willem Endstra en Willem Holleeder, legerleidsmaan Desi Bouterse, politicus Geert Wilders, zengeres en tv-perseunlekheid Patty Brard en voetballer Robin van Persie.

Zaak-Bouterse[bewirk | brón bewèrke]

De joonge Moszkowicz raakde bekind doortot heer de Surinaamsen ex-dictator Desi Bouterse góng verdeidege. Heer deeg dat in plaots vaan ziene pa, dee devaan aofzaag door zien vrundsjap mèt collega Gerard Spong. Spong had in Suriname zelf bij de Decembermaorde, boeveur Bouterse terechstoont, vrun verlore. 't Verdeidege vaan Bouterse woort de joonge Moszkowicz neet koelek genome, zien al te vrundsjappeleke ban mèt häöm evels wel. Zoe kós me foto's trèkke boe-op de twie ziech nao de wins vaan de zaak umhelsde, zoewie beeld sjete vaan e denske wat de twie mètein dege. Vaan dat lèste zag heer tot 't beeld oet zie verband gerete waor: heer zouw dao neet mèt Bouterse aon 't danse zien, meh door de lèsten eve vaan 'n aander denske zien weggetrokke.

Endstra en Holleeder[bewirk | brón bewèrke]

't Wèrke veur zoewel Endstra es Holleeder veel bij väöl lui verkierd: Holleeder woort verdach vaan aofpersing op Endstra en me naom Moszkowicz koelek veur t'r duvel en zien aw moor te wèrke. De erve Endstra deende 'n klach in tege Moszkowicz bij de Orde vaan Avvekaote, boe-in ze eisde tot de maan verboje woort veur Holleeder te wèrke. Zij woorte dao-in gesteund door journalis Jort Kelder, dee Moszkowicz veur e 'maffiamäötsje' oetmaakde. D'n avvekaot spande dao-op in fibberwaire 2007 'n zaak tege Kelder aon, die heer verloor: de rechter voont tot Moszkowicz zien betrèkkinge tot beroopskrimmenele zoe sterk waore tot dees kwalificatie riechteg waor. In hoeger beroop woort dees oetspraok wel aofgezwak.

Op 15 fibberwarie, d'nzelfden daag tot de rechter in iersten aonlag oetspraok had gedoon, leep de situatie oet de hand. Vaanoet 't ketoer vaan Moszkowicz zouwe belastende stökker euver Endstra zien geleek, wat d'n avvekaot ziene nuie cliënt Holleeder in e beter daagleech zat. Zoe kaom 't al gaw tot bedreiginge tege Moszkowicz, dee pelitiebewaking kraog. Oetindelek lag heer op de 19en de verdeideging vaan Holleeder neer.

Zaak-Wilders[bewirk | brón bewèrke]

In 't perces-Wilders, wat in 2010 en 2011 leep, verdeidegde Moszkowicz de rechse politicus. Huugdepunt veur d'n avvekaot in dit proces waor de vraking vaan d'n tribbenaol op 22 oktober 2010. Oetindelek woort Wilders op 23 juni 2011 gans vrijgesproke.

Tuchzaak[bewirk | brón bewèrke]

In 2012 spande de Nederlandse Orde vaan Avvekaote e proces tege Moszkowicz aon bij de Raod vaan Disciplien. De klachte waore financieel vaan natuur, zoewie 't aonnumme en neet aongeve vaan groete somme baar geld en 't neet euverlègke vaan de lèste drei jaorrekeninge, meh gónge ouch euver te wieneg rechbijstand: zoe klaogde väöl cliënte tot heer neet op aofspraoke waor gekoume, 'ne stagair veur ziech had doen pleite en oonbereikbaor veur klachte waor. D'n deke had e jaor sjorsing geëis, boevaan e haaf jaor veurweerdelek; de Raod evels, die alle klachte gegroond verklaorde, voont op 30 oktober tot Moszkowicz zie vak zoe had verwaarloes tot heer oet zien amb mós weure gezat.

Moszkowicz had 30 daog d'n tied um heitege in beroop te goon, wat heer ouch deeg. Op 22 aprèl 2013 evels bevèstegde d'n Hoof vaan Discipline dit royemint, boemèt Moszkowicz veurgood oet zien amb woort gezat.[1] Me naom häöm neve de feite boeveur heer in iersten aonlag al waor geroyeerd, bezunder koelek tot heer, oondanks beloftes, niks had gedoon um verbetering in zie functionere te bringe.[2]

Nao 't royemint[bewirk | brón bewèrke]

Ind november 2013 maakde Moszkowicz bekind tot heet es juridisch adviseur zouw goon wèrke bij 't avvekaoteketoer vaan ziene veurmaolege collega Henk Brink.[3]

Op 21 aprèl 2015 woort officieel bekind tot heer liestrèkker zouw weure vaan de rechs-conservatief partij VNL, die waor voortgekoume oet 'n aofsplitsing vaan de PVV.[4] 13 jannewarie 2016 woort heer dao weer oetgezat, umtot 't partijbestuur häöm neet betrokke genoog voont.[5]

Media[bewirk | brón bewèrke]

Boete de rechszaol raakde Moszkowicz bekind es misdaodkundege in RTL Boulevard, en door 'n talentejach veur jóng avvekaote in 2005, oonder de naom De Nieuwe Moszkowicz. Ouch waor heer te zien in Villa Felderhof, Zomergasten en NOVA College Tour.

Privéleve[bewirk | brón bewèrke]

Moszkowicz is twie kier getrojd gewees en heet oet allebei de houweleke kinder. Tot 2012 had heer 'n relatie mèt nuitslezeres Eva Jinek; de breuk woort einen daag veur zie royemint bekind. 'ne Persoeneleke vrund vaan häöm is d'n ouch juudse sjriever Leon de Winter.

Bron[bewirk | brón bewèrke]

Dit is artikel is vrij vertaold oet 't corresponderend Nederlandstaoleg artikel, en wel in dees versie.

Rifferenties[bewirk | brón bewèrke]

  1. Nu.nl - Hof van Discipline zet Moszkowicz definitief uit ambt
  2. NRC.nl - Beloften Moszkowicz aan tuchtrechter zijn niet ingelost
  3. De Telegraaf - Moszkowicz heeft nieuwe baan
  4. NRC.nl - Kijken: presentatie Bram Moszkowicz als lijsttrekker nieuwe partij VNL
  5. Nu.nl - Bram Moszkowicz uit politieke partij VNL gezet
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Bram_Moszkowicz&oldid=456336"