Austeriteit
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Austeriteit[1], ouch wel bezuinegingspolletiek, bekrumpingspolletiek en einvojdegspolletiek geneump, is 'ne term oet de ikkenomische weitesjappe en polletieke weitesjappe die riffereert nao 'ne reeks aon polletiek-ikkenomisch belump wat ziech riech op 't verkleine vaan de gouverminteel begroeting door te korte op oetgaves, door 't verhoege vaan taks of door 'n combinatie vaan de twie.
Austeriteitsmaotregele weure dèks gebruuk door euverhede die 't lesteg höbbe um nog örges veurdeileg te liene, of überhaup te liene (euverhede die dus neet mie de staotssjöld kinne verhoege), of meuilekhede oondervinde um de aw lieninge trök te betaole. Meistes gebäört dat euvereges tegeliekertied: staote die hunne sjtaotssjöld neet mie kinne trökbetaole zien staote die dèks ouch nörges mie kinne liene. Heidoor dreige ze in 'ne negatieve spiraol terech te komme: de meuite um nog örges te liene zörg d'r veur tot aw lieninge neet kinne weure trök betaold, en de meuite um trök te betaole zörg d'r veur tot geine partner mie geld wèl oetliene aon dee staot.
Versjèllende ikkenome en polleticologe stèlle allewijl tot austeriteit slech belump is um de ikkenomie mèt te stimulere. Die ikkenome stèlle tot de Eurocrisis an sich neet Griekeland in de crisis goeide, mer de austeriteit die Griekeland noedgedwonge mos aongoon vaan de Europese Unie um in d'n Eurozone te blieve. Veurstenders zègke evels tot austeriteit d'r veur zörg tot creditäörs weer vertrouwe kriege in de betröffende regering en staot, en tot dee staot in de touwkoms weer gemekeleker en goojkouper geld kin liene umtot deze staot heet getoend 'n zeker maote aon fiskaol discipline te höbbe es 't nudeg is.
In d'n Eurozone verpliech 't Europees Stabiliteitsmechanisme lidstaote mèt e begroetingstekort vaan mie es 3% vaan 't BBP um bekrumpinspolletiek te veure.
- ↑ Vaan 't Ingels austerity, 't Duits Austerität en 't Frans politique d'austérité. Op 't Nederlands weurt dèks bezuinigingsbeleid gebruuk, mer ouch 't Ingels lienwoord austerity.