Aung San Suu Kyi

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Aung San Suu Kyi (Burmees: အောင်ဆန်းစုကြည် [ʔàʊɰ̃ sʰáɰ̃ sṵ tɕì]; Rangoon, 19 juni 1945) is 'n Burmese politica en vrijheidskaampster. Gebore es joonkste dochter vaan oonaofhenkelekheidskaamper Aung San (dee storf wie ze twie jaor waor) studeerde ze in Delhi en Oxford um tenao bij de Vereinegde Naties te goon wèrke. Wereldwied bekind woort ze in 1988, bij de 8888-opstand tegen 't militair rezjiem vaan 't land. Es leister vaan de Nationaol Boond veur Democratie (NLD) woort ze 't geziech vaan deen opstand, boeveur ze in 1991 de Nobelpries veur de Vrei touwgekind kraog. Sinds 1989 stoont ze oonder hoesarres op las vaan 't rezjiem. Bij de verkezinge vaan 1990 won de NLD mèt groete euvermach; 'nen oetslaag dee 't rezjiem neet accepteerde.

In 2010 woort Aung San Suu Kyi vrijgelaote in 'n beweging vaan 't rezjiem nao mie vrijheid en 'n börgerregering. Algemein verkezinge in 2015 woorte mèt groete euvermach gewonne; noe accepteerde de junta d'n oetslaag wel en woort Aung San Suu Kyi de staotskanseleerse (zègk 'minister-president') annex minister vaan Boetelandse Zakes. 'n Klein vief jaor waor ze de mechtegste persoen in Myanmar. Ze woort wiedoet bewoonderd, meh haolde ouch kritiek, oonder mie umtot ze volgens väöl lui te wieneg deeg tege de vervolging vaan de Rohingya in 't weste vaan 't land. In fibberwarie 2021 kaom aon häör bewind 'n ind wie 't leger obbenuits de mach greep. Deeskier woort Aung San Suu Kyi zelfs in de gevaangenis gezat. In e sjijnperces woorte ze tot 33 jaor gevaangesjap veroerdeild, later trökgebrach tot 27.

Dit artikel is e sjtumpke. De kans Wikipedia helpe door 't aan te völle