Alawiete

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

De alawiete of alaviete (Arabisch: علويون, ʿAlawīyūn; Turks: Arap Alevileri) zint 'n religieus gemeensjap i g'n Levant die is vuurtgekoame oet d'r sjiitische islam. Alawiete kalle Arabisch en woeëne versjpreid in 't noardweste va Syrië, mieë precies in 'n kussjtrook langs de Middellandse Zieë, 't zude va Turkieje en 't noarde va Libanon. Groeëte gemeensjappe besjtónt ooch in Duutsjland en Argentinië. Ze zint neet te verwarre mit etnisch Turkse en Koerdische aleviete. Aafgezieë van de etnische identiteet gieëf 't ooch versjille op 't gebeed van 't geleuf. De beweging woeëd in d'r 9e ieëw ópgerich durch Ibn Noesair. Heidurch woeëde alawiete vreuger ooch noesairi's geneumd. Huuj d'r daag gieëf 't weltwied zo'n 4 mieljoeën alawiete.

't Alawisme is 'n gnostische beweging binne d'r sjiitische islam. Alawiete geleuve dat de twelf imams de rechmieësige opvolgers zint va Mohammed, net wie dat Mozes en Jezus twelf apostele houwe. Ze verieëre Ali ibn Abi Talib es incarnatie va God, d'r ieësjte imam binne 't sjiisme. Tupisj vuur 't alawisme is evvel vuural 't geleuf in 'ne God in drei persoeëne. E vergeliekbaar concep hat 't christedom mit zien lier van de triniteet. Angesj es de mieëtste moslims beëne ze noeëts vief kier per daag (salah) en anger luuj weëde neet (aktief) bekierd tot 't alawisme. Ze geleuve wiejer i reïncarnatie en vere christlige fesdaag.

Alawiete weëde döks gediscrimineerd durch anger moslims en ooch regelmieësig vervolg. Tiedes 't bewind van de familie Assad, 'n alawitische familie, woar hun positie verbeëterd. Evvel tiedes d'r Syrische Burgerkreeg hat de bevolkingsgroep te make mit sektarisch geweld, zikker noa d'r val van 't Assad-regime in 2024.