Via Belgica
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Via Belgica (Via Agrippinensis) ies 'ne nuje naam, sjtammend oet de 21e ièw in Limburg, dae gegeve ies aan de 400 kilomaeter lange Romeinse weeg, dae geloupe haet van Boulogne sur Mer (Gesoriacum) in Frankriek, door (Belsj) via Tienen, Helshoven, Tóngere (Aduatuca Tungrorum), door Zuud Limburg via Mestreech euver de Maas (Mosa Trajectum), Meersje, Vroenhof (Houtem), Sint-Pièter (Valkeberg), Walem, Ransdaal, Kunder, Heerle (Coriovallum), Greunsjtraot, Rimburg euver de Worm, Julich (Iuliacum) nao Kölle (Colonia Claudia Ara Agrippinensium) in (Duutsjland).
Hie en dao ies door opgravinge mèt zekerheid 't weegtraject en/of Romeinse bewoning (ummer in de buurt van waeg) vasgesjtèld. In Helshoven 'n sjtök weeg; in Tóngere romeinse beboewing; in Mestreech ies dat 'n brök euver de Maas en reste van therme; reste van 'ne weeg aan de Meersjenerweeg; in Meersje, op de Herkeberg, loog 'ne Romeinse villa en 'n sjtök weeg; in Vroenhof höbbe ze ouch 'n sjtök weeg opgegrave; ten noorde van Houtem liegke de reste van 'ne Romeinse tempel en villa's (in de Rondebos en de Ravesbösj); in Sjtraobaek en Brokem zint Romeinse graver gevónge, bie Walem höbbe ze de fundamente van 'ne wachtore opgegrave; in Ransdaal 'n Romeins graaf (urne); in Kunder 'ne Romeinse villa (Ten Hove), in Heerle Romeinse therme; in Rimburg 'ne Romeinse villa .
De weeg woort aangelag veur militair doele, meh ouch, en zeker later, gebruuk es handelsweeg door de bevolking. Langs de weeg sjtinge indertied op de hoager gelege gedeiltes en ander sjtrategische punte wachtores. Dao zint reste van gevónge ten noorde van Houtem en op de Goudsberg bie Walem. Tösje die wachtores woort ónderling geseind.
