University College Maastricht

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.



Foto vaan de UCM väörgievel

University College Maastricht (aofgekort es, en oonoffesjeel UCM) is 't Ingelstaolege, liberal arts and sciences-departemint vaan de publieke Universiteit Mestreech in Mestreech, Nederland. Gestiech in 2002, UCM is sinds 2006 gevèsteg in 't gerinnoveerde Nieuwenhof-klooster in 't Jekerkerteer, en heet oondertösse naoventrint 600 studente.

Program[bewirk | brontekst bewerken]

Bij 'n liberal arts and sciences-opleiing (lètterlek vertaold: vrije kunse en wetensjappe), aofkomsteg vaan 't middeliewse artes liberales, zien studente verpliech um 'n groet deil vaan hun vakke te volge in aandere disciplienes es hun hoofriechting. University College is de term dee in Nederland gebruuk weurt väör liberal arts-departeminte vaan universiteite. UCM oondersjeit ziech vaan de andere university colleges door middel vaan 't gebruuk vaan Probleemgestuurd Oonderwies (Ingels: Problem-Based Learning Nederlands: Probleemgestuurd Onderwijs) en tot studente neet verpliech zien op 'n campus te woene (dit is ouch neet meugelek umtot UCM gein woenfaciliteite heet).

Binne d'n opleiing zien drei hoofriechtinge: Humanities (Geiswetensjappe), Social Sciences (Sociaole wetensjappe) en Sciences (Levens- en natuurwetensjappe). Zjus wie bij d’n aandere university college-departeminte mage studente hun eige riechting oetzeuke en heiin ouch ‘t vakkepakkèt zelf samestèlle. Neve dees eige käös höbbe studente d’n verpliechting um zoewel ‘n aontal algemeine vakke te volge en twie vakke te doen in een riechting dee zie neet gekoze höbbe.

Nao UCM, boe maan aofhenkelek vaan de samegestèlde vakkekäös Bachelor of Arts (BA) of Bachelor of Science (BSc) krijg, goon studente wijer mèt ‘n Masterprogram boebij ‘t tiep ouch aofhankelek is vaan dees geneumpde käös.

Campus[bewirk | brontekst bewerken]

UCM is gevèsteg op de Zwingelepöt vaan 't Mestreechse Jekerkerteer, in 't väörmalige Nieuwenhof-klooster, oersprunkelek 'n rooms-katheliek ermehoes en vaanaof 1797 ‘n weishoes, boevaan de ierste fóndeminte zien opgetrokke in d’n 15e-iew [1]. Dees functie heet ‘t gebouw behawwe bis 1980 wienie ‘t binne inkele jäör eigendom woort vaan de Mestreechse universiteit. Nao ‘n oetgebreiie rinnovatie woort ‘t klooster in 2006 es campus in gebruuk genome.

Touwlaoting en studente[bewirk | brontekst bewerken]

Nuie studente weurde twie kier per jaor touwgelaote door middel vaan ‘n aonmèllingperces, en heimèt is UCM ‘n selectieve studie, zjus wie de aandere university colleges. UCM heet zoe’n 40 nationaliteite, mèt 50% neet aofkomsteg oet Nederland.

Internationaole samewèrking[bewirk | brontekst bewerken]

Gedorende d’n jäör heet UCM betrèkkinge opgebouwd mèt ‘n groet aontal universiteite boete Nederland, boebij zoewel Europese es intercontinentaole universiteite. Heimèt krijge studente vaan UCM d’n meugelekheid um väör ein semester bij ‘n partneruniversiteit vakke te volge. Väörbeelde vaan dees partners zien oonder aandere: Korea University, Queen’s University, University of California, University of Sydney, Université de Toulouse en Universidad de Sevilla.

Referènties[bewirk | brontekst bewerken]

  1. Ubachs, P.J.H. & Evers, I.M.H., Historische Encyclopedie Maastricht, 373, opgezeuk op 20 mei 2012