Sjömmert

Dit artikel is gesjreve in 't Sjömmerts. 't Weurt gewaardeerd óm in dit artikel 't Sjömmerts aan te hauwe of aan te gaeve welk anger dialek gebroek is.

---

De kèrk van Sjömmert geboewd in kundersjtein.

Sjömmert (Nederlands: Schimmert) is e dörp in de gemeinte Nut en nao Nut zelf en Hölsberg de groatste kern. Sjömmert is, nao Ubachsberg, 't hoags gelaege kèrkdörp van Nederland. Tot 1982 waor 't 'n zelfsjtendig gemeinte. Woa se ouch nao toe geis, doe mós ummer bergaaf, of se noe nao 't aangrenzende Hölsberg, Baek, Sjpawbaek of Nut geis. In 2002 wone d'r 3500 luuj.

In 't jaor 50 zou hie 'n nederzètting höbbe gesjtange van de Sunici of Schineks. De ièrsjte vermelding zou zin oet 847 es Schimortera.

Buurtsjappe

Bie Sjömmert huère de buurtsjappe:

• Oansel (Oensel)
• Gekruts (Gekruis)
• Groat Hazel (Groot Haasdal)
• Klein Hazel (Klein Haasdal)
• Op de Bies
• Roosebeek is 'n buurt die in 't midde van Sjömmert lik. Ze besteit oet twiè sjtraote: de Rooseveltsjtraot en de Bekerbaan. De buurt haet 'n buurtvereiniging.
  
• De Put is 'n buurt besjtaonde oet de Mareweg, de Langsjtraot, de Vauwerhofwaeg en Rozemarijnsjtraot.

Bezeenswaerdig

De watertaore van Sjömmert

• Sjömmert is bekènd van ziene watertaore oet 1926, dae al van gans wied is te zeen. Eigelik sjteit deze in Haasdal. Architect Jos Wielders maakde 't óntwerp, dat vèlt ónder de sjtiel van de Amsterdamse sjoal. De huègde ies 38 maeter en de taore sjteit op 178 m baove A.P. 't Betonne reservoir haet 'ne doorsjnee van 13,5 m., 'n deepde van 7.90 m en 'ne inhoud van 1150 m3 of 1.150.000 lieter.
• In de Hoofsjtraot sjteit de neogotische kèrk gewiejd aan de heilige Remigius. Ze is geboewd in kundersjtein op de fundamente van 'n ouwer kèrk oet 1832. De tore ies 65 maeter hoag. De architecte van 't geboew zint Joseph Cuypers en Pierre Cuypers jr.. Binne sjtoon 'n Barbarabeeld van Charles Eyck, 'n houte beeld van Theresia van Lisieux van Jean Weerts en gebrandsjilderde vènstere van Jos Stassen. De pastorie sjtamp van 1898. Hie lik 'n aantal ouw häöf woa-ónder eine dae in vakwerk is opgetrokke.

Persone

In Sjömmert woort Gulielmus Lemmens gebaore, dae van 1932 bis 1958 bisjop van 't bisdom Remung waor.

Legende

Euver Sjömmert geit ouch ein legende. Wie Karel de Groate ins verdwaald waor, zoog hae op 'n gegaeve moment örges 'n leech sjiene (Sjènne), en 'n leech sjömmere (Sjömmert). Omdat hae zao dankbaar waor dat 'r de waeg weer truk houw gevónge, leet 'r oet dank op de plaats woa hae 't leech zoog sjiene en sjömmere ein kapel boewe

Dörpsvereiniginge

• Fanfaar St. Caecilia 1845
• Voetbalvereiniging Schimmert 1940
• Carnavalsvereiniging de Taarbreuk 1957
• Toneelvereiniging Crescendo
• Jong Nederland
• Sjuttersgezelsjap Sint Sebastiaan