STS-133
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
STS-133 (voloet Space Transportation System 133) waor 'n Space Shuttle-missie nao 't International Space Station. De Space Shuttle Discovery is op 24 fibberwarie 2011 um 22:53:24 Nederlandsen tied gelanceerd[1]. Op 9 miert 2011 landde de Discovery weer veileg op Kennedy Space Center. Primair missie waor 't aoflevere vaan de Pressurized Multipurpose Module (PMM) (de aongepasde Multi-Purpose Logistics Module Leonardo), de ExPRESS Logistics Carrier en Robonaut2 ('ne robot dee in 'n later stadium, nao oetvoereg teste, kin helpe bij ruimtewandelinge).
De missie waor de 39e en lèste veur de Discovery. Oersprunkelek waor dit ouch de lèste vlöch vaan 't Space Shuttle-program, mer dat veranderde toen STS-134 woort verplaots nao 'n lancering in fibberwarie 2011 (dees vlöch is intösse verplaots nao 19 aprèl 2011). Intösse is bekind tot nog 'n missie, STS-135, zal weure gevloge, es de Launch On Need-missie STS-355 neet nudeg is. De lanceerdatum vaan dees vlöch is nog neet bekind.
Op 20 september 2010 is Discovery verplaots (de zoegenaomde "rollout") vaan 't Vehicle Assembly Building (VAB) nao lanceerplatform 39A. Oersprunkeleke lanceerdatum waor 1 november 2010. Dit woort 'n aontal kier oetgestèld. Bij de lanceerpoging op 5 november 2010 woort bij 't tanke vaan de waterstoftank e leek oontdèk. Bij controle vaan d'n externen tank woort 'n sjäör oontdèk. Wijer controle lieverde nog mie sjäöre op en oeteindelek is beslote de Discovery trök te rolle nao de VAB, umtot reparaties op 't lanceerplatform neet meugelek waore.
Bemanning[bewirk | brón bewèrke]
De Discovery had 'n bemanning van zès lui: commandant Steven W. Lindsey, piloot Eric A. Boe, en de missie-specialiste Benjamin Alvin Drew, Jr., Stephen G. Bowen[2], Micheal R. Barratt en Nicole Stott. De lèste twie waore in de ruimte (es bemanning vaan ISS-expeditie 20) op 't momint tot bekind woort gemaak tot zie deil zouwe oetmake vaan dees bemanning. Drew is de lèsten Afrikaans-Amerikaansen astronaut dee in 'ne Space Shuttle zal vlege. Bowen, dee ouch tijdens de missie STS-132 vloog, vervóng Timothy L. Kopra, dee bij 'n fietsoongelök op 15 jannewarie zien heup braok. Bowen is daomèt d'n iersten astronaut dee daadwerkelek twie opeinvolgende Space Shuttle-missies vloog.
Ruimtewandelinge[bewirk | brón bewèrke]
Bowen en Drew höbbe op de vijfde en zevende vlöchdaag 'n ruimtewandeling gemaak.
