STS-132

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Embleem vaan STS-132
Crew vaan STS-132

STS-132, ofwel voloet Space Transportation System 132, is 'n Space Shuttlemissie nao 't International Space Station. De missie woort oetgevoert door de Space Shuttle Atlantis. De lancering waor op 14 mei 2010, um 20:20 uur Nederlandsen tied.[1]. De landing waor zoe'n 12 daog later op 26 mei 2010, um 14:49 Nederlandsen tied. Totale lengte vaan de missie waor 11 daog, 18 oor en 29 minute.

Primair laojing waor de Russische Rassvet Mini-Research Module same mèt de Integrated Cargo Carrier-Vertical Light Deployable (ICC-VLD).

STS-132 is veurluipeg de allerlèste vlöch vaan de Space Shuttle Atlantis es de STS-355 Launch On Need reddingsvlöch neet nudeg is. Meugelek kump evels nog ein extra missie (STS-135). Umtot Atlantis klaor gemaak is veur STS-355 kos 't relatief wieneg um de shuttle toch nog te lancere veur 'n regulier missie. De goodkäöring veur STS-135 moot evels nog kaome.

Bemanning[bewirk | brón bewèrke]

De bemanning bestoont oet 6 persoene: commandant Kenneth Ham, piloot Dominic A. Antonelli, en de missie specialiste Micheal T. Good, Piers Sellers, Stephen G. Bowen en Garrett Reisman. Oersprunkelek waor Karen Nyberg ingedeild, mer vanwege tijdeleke medische problemen is zie vervaange door Micheal Good.[2]

Missie/tiedlijn[bewirk | brón bewèrke]

Op 22 aprèl 2010, nao inkel daog vertraging door slech weer, is de Space Shuttle Atlantis vaan 't Vehicle Assembly Building nao lanceerplatform 39A gerold.[3] De bemanning waor daobij ouch aonwezeg, wat zelde gebäört, en noe kóste zie zelfs op de mobiele lanceerinriechting mètrije.

Op 14 mei 2010 waor de lancering, en op 16 mei 2010 koppelde d'n Atlantis aon 't ISS. Op vlöchdaag 4 (17 mei 2010) waor de ierste ruimtewandeling, woebij 'ne extra sjotel woort geïnstalleerd (de Space to Ground Antenna of SGANT). Ouch woort 'n nui instruminteplatform veur Dextre geïnstalleerd. Op vlöchdaag 5 (18 mei 2010) woort de Rassvet module geïnstalleerd aon de Zarya servicemodule. Op vlöchdaag 6 waor de twiede ruimtewandeling um versjèllende batterije te vervaange. Vlöchdaag 7 stoont in 't teike vaan 't teste vaan de Rasvett module. Ouch woort veurraod vaan d'n Atlantis nao 't ISS verplaots. Op 21 mei 2010 (vlöchdaag 8) waor de daarde ruimtewandeling. Nog mier batterije woorte vervaange. Vlöchdaag 9 waor 'ne rösdaag en op vlöchdaag 10 woort d'n Atlantis losgekoppeld vaan 't ISS. Vlöchdaag 11 en 12 woort gebruuk um alle systeme vaan Atlantis te teste veur de landing en op vlöchdaag 13 waor de landing um 14:49 Nederlandsen tied.

Referenties[bewirk | brón bewèrke]

Commons
Commons
Op de pazjena STS-132 van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=STS-132&oldid=342620"