Play-off

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


'ne Play-off is 'n einmaolege competitie tösse minstens twie sportteams oonderein um 'n hoeger sportief doel te bereike. Wienie mier es twie clubs deilnumme, is de play-off in miniatuur-toernoojvörm opgezat, gemeinelek in knock-outvörm meh soms ouch wie 'ne liga. De play-off kin oet eine match bestoon, oet twie (eine kier oet en toes veur allebei) of oet 'n ooneve aontal vaan drei of mie (best of three/five/seven), boebij deginnege wint dee de mieste euverwinninge pak. Gemeinelek volg 'ne play-off nao de regulier competitie; op groond vaan de rizzeltaote dao-in weurt bepaold wee oonder welke veurweerde maag mètdoen.

Veurbeelder[bewirk | brontekst bewerken]

Play-offs weure oonder mie gespäöld in 't Belsj en Nederlands voetbal. In de Belzje Ierste Klas (officieel Jupiler Pro League) weure aon 't ind vaan de regulier competitie de punte gedeild door twie, boenao de zès boveste ploge nog ins twie kier tegenein speule. Zoe weurt de landskampioen bepaold, meh ouch de nommers 2-6; op wat veur plaots me indeg is vaan belaank veur 't behole vaan Europees voetbal. De ach ploge die dao-op volge (nommers 7-14 dus) speule nog iers in twie poules vaan eder veer; daonao speule de winners tegenein um 't lèste ticket veur Europees voetbal. De lèste twie clubs (nommers 15 en 16) speule nog tegenein um degradatie in 'ne best-of-five. De verlezer degradeert direk, de winner späölt tege de drei periodekampioene vaan de Twiede Klas. Veur d'n direkten degradant kump de kampioen vaan de Twiede Klas in de plaots, die trouwens veur zienen titel gein play-offs späölt.

In 't Nederlands voetbal zien de play-offs bejeiener. Dao speule de nommers 5-8 vaan de Ieredevisie play-offs um 't zèsde, mins gunsteg ticket veur Europees voetbal. In 'n haaf finaal speule de boeteste en de binneste clubs tegenein (5-8, 6-7); de winners make 't daan weer oonderein oet. Wienie de winner vaan de KNVB-beker bij de bèste ach zit, deit de nommer 9 in ziene plaots aon de play-offs mèt. Daan speule de veurlèste en ieveurlèste (nommers 17 en 16 dus) nog play-offs um in de Ieredevisie te blieve. Ze numme 't op tege neet minder es ach clubs oet de Ierste Devisie (de veer periodekampioene aongevöld mèt nog veer teams). Iers make de liegste veer gekwalificeerde Ierste Devisieteams oonderein oet wee doorgeit, die twie struime daan in in 'n twiede runde (mèt nog ach clubs), en in 'n daarde runde (mèt nog veer clubs) weurt oetindelek oetgemaak welke twie clubs volgend jaor in de Ieredevisie oetkoume. Alle Nederlandse play-offs zien volgens e conventioneel knock-outsysteem, dus mèt eine match toes en eine oet, boebij 't doelsaldo (mèt prioriteit veur oetgole) d'n doorslaag gief.

Play-offs weure ouch gehawwe in aander competities, wie de Nederlands körfbal- en handballiga's.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Play-off&oldid=354248"