Pieter Defesche

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.

---

Pieter Defesche (Mesjtreech, 1921 – Ulesjtraote, 13 juli, 1998) waas 'ne Nederlandse beeldend kunstenaer.

Biografie

Defesche vervaardigde sjilderieje, gouaches en grafieke. Hae sjilderde meistal landjsjappe, sjtillaeves en biebelse taferele in expressionistische, bienao absjtrakte sjtiel. Hae maakde ouch collages, wandjsjilderinge, decors en kesjtume (ónger meë veur 't Scapinoballet).

Defesche volgde zien opleijinge aan de Middelbare Kunsnieverheidssjoal in Mesjtreech en de Rieksakedemie veur Beeldende Kunste in Amsterdam. Hae woort sjterk beïnvloed door ziene leërmeister aan de Rieksakedemie Heinrich Campendonk.

In 1949 óntving Defesche de Prix de Rome. In 1953 maakde hae ein Sjpanjereis. Zien lyrisch-absktrakte sjildertrant van de jaore '50, wo-in 't blaw en 't broen euverheërsjde, maakde róndj 1960 plaatsj veur kleurrieke kontraste en ein groatere helderheid. In 1964 óntving hae de Prix Europe de La Peinture. Begin jaore '70 óntwikkelde hae ein menier van sjildere die van doe aaf aan neet wezelik meë verangerde. D'r vóndje aevel bènne zien beeldtaal ónophawtelik accentversjuvinge plaatsj. Mèt veural 't landjsjap es oetgangspuntj, sjilderde Defesche ein werkelikheid die zich es mythisch leët ervare, wobiej hae aanhauwend laveerde tösje figuratie en absjtraktie. Van 1969 tot 1987 waas hae es hoagleëraar verbónje aan de Jan van Eyck-Academie in Mesjtreech.

Defesche beheuërt mèt Ger Lataster, Jef Diederen, Lei Molin, Pierre van Soest, Jan Stekelenburg, Frans Nols en Harry op de Laak tot de groep die in de sjilderkuns ooch waal bekènd sjteit es 'de Amsterdamse Limburgersj'.

Ein pas óntdek reisdaagbook, vol perseuënlike aanteikeninge en tieëntalle sjetse en wirkteikeninge veur toekómstige sjilderieje, versjaf naoder inzich in laeve, werk en de dènkwaereld van Pieter Defesche. De kunssjilder, eine sjtudiegenaot van Karel Appel en Corneille, lag 't allein mèr veur eige gebroek bedoelde versjlaag aan in 1973 biej ein lang reis door de Pacific die häöm nao Hawaï, Rarotonga, de Fiji-eilande, de Salomonseilande, Guam, de Verenigde Sjtate, Hongkong en Japan brach. De publicatie "Mijn gedachten dansen naar duizend heuvels - verslag van een tocht door de Stille Zuidzee" versjeen veer jaor na ziene doad ter gelegeheid van de gelieknamige expositie in 't Cobra Museum véur moderne kuns in Amstelveen (Rotterdam, 2002, uitg. Bèta Imaginations). 't Postuum gepubliceerde reisversjlaag haet ein inleijing door de mèt Defesche bevrundje dichter en 'daagbookvènjer' Hans van de Waarsenburg.

In 2006 sjónk de widvrouw Dollie Defesche-Bakker alle door häöre man naogelaote kunswerke aan 't "Museum van Bommel van Dam" in Venlo. 't Atelier-oeuvre van Cobra-veurgenger Defesche maak noe deil oet van de basiscollectie van dit museum.