Pierre Massy
Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.
Petrus Hubertus (Pierre) Massy (Remunj, 3 februari 1900 – Remunj, 3 augustus 1958) waas 'n Nederlands Limburgse voetballer.
Massy kaom oet 'n gezin mèt vieftieën kènjer en wirkde es mienwirker, sigarètteverkouper, sjpaorlègker, monteur en elektricien. Hae voetbalde ruum 20 jaor op 't hoagste niveau in 't Nederlandse amateurvoetbal. Zien eësjte club waas Roermondia oet Remunj, later nao 'n fusie mèt R.V.V. woort dit RFC Roermond. In november 1933 verkaste hae óngerèns nao BSV Olympia in Boxmeer óm vervolges in april 1935 bie RFC trök te keëre naodat dees club waas gepromoveerd nao de eësjte klas. In 1936 sjpeelde RFC in 's-Hertogenbosch de finale óm de KNVB-baeker. 't Veroverde, mèt dank aan Massy, de baeker door 'n 4-2 euverwinning op KFC oet Koog aan de Zaan. Op 31 oktober 1926 debuteerde Massy es 'centerhauf' in 't Nederlands èlftal in 'ne interland taenge Duutsjlandj dat in Amsterdam mèt 3-2 wón. Hienao zouw hae nog 11 maol es sjtoppersjpil veur Oranje sjpele, wobiej hae de beroemde Ajacied Wim Anderiesen oet de nasjenale ploog hèj gesjpeeld. Hae scoorde in de twelf duels drie maol veur Oranje. Hae besjikde euver 'ne geweldige sjpróngkrach, atletisch vermoge en acrobatiek, gèt wat in daen tied óngewoon waas.
Massy waas biezónjer póppelaer in Remunj. In ziene glorietied woorte in de bisjopssjtad Massy-kervatte, Massy-breuk en Massy-jes verkoch. Ziene bienaam in de voetbalwaereld waas 'De Lènkse', oftewaal 'Jèrke', zoa-es zien vrunj häöm neumde.
Ziene lètste interland sjpeelde Massy tiedes de Olympische Sjpele in Amsterdam, op 30 mei 1928 taenge Uruguay (0-2). In september 1935 óntving hae van Bob Glendenning, de Èngelsje bondscoach van Oranje, ein oetneuëdiging veur de centrale training. Massy, toen wirkzaam bie 'n maelfebriek, sjreef 'n bedankbreefke wo-in hae leet weite dat hae van ziene baas gein verlof kreeg óm nao Amsterdam te gaon. In wirkelikheid hèj de nukkige Massy aevel neet väöl zin in de reize nao "'t wieje Hollandj" en 't boetelandj en ouch aan de plichpleginge róndj 't Nederlands èlftal hèj hae 'ne haekel. Door zien aafzègking woort 't Oranjebook door häöm defenetief gesjlaote.
Bie 't oetbraeke van de Tweide Waereldaorlog sjtopde hae, veërtig jaor awt, mèt voetballe.
Trivia[bewirk | brón bewèrke]
Op 't terrein van de Roermondse Football Club sjteit de in brons vereëuwigde Pierre Massy, in de jaore twintig van de veurige eëuw twèlf maol international veur Oranje.