Philippe van Gulpen
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Philippe van Gulpen waor ‘ne aquarellis dae gebore ies es Philippe Wilhelmus Jacobus in Mestreech op 18 mei 1792 es zoon van Catharina Elisabeth Hess en de pómpemeker Wilhelmus van Gulpen. In de Franse tied dae volg, rónd 1800, zal hae ziechzelf, nao de mode van toen, Philippe Guillaume Jacques van Gulpen neume. Vlak nao de geboorte sjtörf de pap, de mam hertrouwt en de nónk, notaris Jan Theodoor van Gulpen, weurt voogd. In 1812 geit Philippe in Deens en wèrk vervolges in ’n militair hospitaal in Hamburg (Duutsjland). Nao drie jaor geit’r truuk nao Mestreech bie ziene nónk wone. Hae sjtudeert veur chirurg in Paries meh maak de sjtudie neet aaf.
Werk[bewirk | brón bewèrke]
’n Opleiding um te teikene haet ’r waarsjienlik neet gehad, te zeen aan de meuite wat’r haet mèt persjpectief.
Hae maak hónderde teikeninge en aquarelle van Mestreech en umgeving en van kesjtièle en boeteplaatse in Nederlands Limburg. De teikeninge zouwe realistische weergaves zin van wat de kunstenaer veur ziech zoog.
Hae sjtèlt twiè Luukse albums same mèt bekans 300 teikeninge.
Ouch sjtèlt hae ‘ne kroniek same van de sjtad Mestreech van 171 handgesjreve pagina’s. Hae besjrief hie-in de tied vanaaf de Romeine tot en met 4 juni 1862. Op 12 juli 1862 sjtörf ‘r in Mestreech
- In 1978 lièt DSM, dat eder jaor 'ne kalender oetgeuf gewiejd aan 'n thema euver Limburg, 'n exemplaar versjiene mèt teikeninge van Gulpe.
- In 2002 vingk ’n tentoansjtèlling plaats in ’t Sjpaans Gouvernement in Mestreech mèt es titel: Mestreech gezeen door de ouge van Philippe van Gulpen. Dan versjient ouch 'ne catalogus.