Peter Winnen

Van Wikipedia
Gank nao: navigatie, zeuke

Dit artikel is gesjreve in 't Gelaens. 't Weurt gewaardeerd óm in dit artikel 't Gelaens aan te hauwe of aan te gaeve welk anger dialek gebroek is.


Peter Winnen, 1980

Peter Johannes Gertrudis Winnen (Ysselsteyn, 5 september 1957) is 'ne veurmalige profwielrenner oet Nederland. Nao zien wielercarrière waas hae ouch actief es sjriever van beuk euver de wielerwaereld.

Biografie[bewirk | brontekst bewerken]

Winnen waas profesjeneel fitserenner van 1980 pès 1991. Es amateur waas zien meis opvallende prestatie in 1980 toen hae es tweëde eindigde in de Vredeskoers. Later dat jaor nóm hae deil aan de Olympische Zomersjpele in Moskou wo hae ein 26e plaatsj behaolde biej de waegwedsjtried individueel.

In 1981 debuteerde hae in de Runj van Frankriek en baarde opzeen mèt ein riteuverwinning nao de Alpe d'Huez, ein viefde plaatsj in ’t eindjklassemènt en de eësjte plaatsj in 't jóngereklassemènt. 't Jaor daonao verbaeterde hae zichzelf nog gèt mèt ein veerde plaatsj in de eindjrangsjikking en opnuuj ein riteuverwinning in ein bergetappe, noe op de Joux-Plane. Zien bèste prestatie leverde Winnen waarsjienlik in 1983 toen hae, nao aanvankelik taengevallend rieje in de Pyreneje, sjterk trökkaom in de Alpe mèt opnuuj ein euverwinning op de Alpe d'Huez. Zelfs de eindjeuverwinning kaom bènne zien bereik. In de lètste bergrit zat zien ploog eine aanval in op klassemèntsleijer Laurent Fignon. Deze aanval faalde aevel door eine zjwaore val van ziene ploogmaat Johan van der Velde en door 't sjterke rieje in de sjlotfase van Fignon zelf. Winnen woort dat jaor derde in 't eindjklassemènt. Hae zouw later verklaore zich noats ech good te höbbe geveuld in dees Runje, ónger angere door ein zjwaor bronchitis die hae kort daoveur hèj opgeloupe, ein gebrek aan vertroewe van ziene ploogleijer Peter Post, door ein verziekte sfeer in de ploog en door privéprobleme.

Hiejnao volgde ènnige taengevallende jaore wo-in Winnen neet meë mèt de baetere mit ómhoag koosj in de berg. Door de kóms van talentvol ploogmaote, zoa-es Erik Breukink, waas d'r aevel weer ein rol van beteikenis veur häöm weggelag. Veural es helper, maar ouch ènnige eërvol plaatsje woorte nog behaold. Zoa woort hae in 1988 nog neugende in zoawaal de Runj van Italië es de Runj van Frankriek en tweëde in de Runj van Zjwitserlandj in 1990, wo hae op sjlechs ein seconde de eindjeuverwinning misde.

Winnen waas veural 'ne klömmer. Toch wis hae in 1990 't Nederlands kampioensjap op de waeg te winne veur o.a. Steven Rooks, Frans Maessen en Erik Breukink. Nao ein aanriejing tiedes ein training veur de Tour de France van 1991 sjtopde hae in dat jaor mèt fitserenne.

Doping[bewirk | brontekst bewerken]

In ein oetzending van 't tv-program Reporter in jannewarie 2000 goof Winnen same mèt Maarten Ducrot en Steven Rooks toe dat hae tiedes zien wielerloupbaan doping hèj gebruuk. [1]

Sjriever[bewirk | brontekst bewerken]

Nao zien actieve wielerloupbaan góng Winnen nao de kunsacademie en publiceerde hae ènnige beuk euver de wielerwaereld, woónger Van Santander naar Santander. Daonaeve sjrief Winnen regelmaotig columns veur gezètte en tiedsjrifte, woónger NRC Handelsblad.
In december 2005 góng ein meziektheaterpreduktie van zien handj in première, getiteld Fiets. De veursjtèlling geit euver de verhoujing tösje de wielersjport, de media en de commercie.

Euverwinninge[bewirk | brontekst bewerken]

1981

1982

1983

1987

1990

Tourdeilnames[bewirk | brontekst bewerken]

  • 1981: 5e, winnaer 17e etappe
  • 1982: 4e, winnaer 17e etappe
  • 1983: 3e, winnaer 17e etappe
  • 1984: 26e
  • 1985: 15e, 3e in de 7e etappe
  • 1986: opgegaeve in de 21e etappe
  • 1988: 9e
  • 1990: opgegaeve in de 11e etappe

Ploge[bewirk | brontekst bewerken]

  • 1980: IJsboerke
  • 1981: Capri Sonne
  • 1982: Capri Sonne
  • 1983: Ti-Raleigh
  • 1984: Panasonic
  • 1985: Panasonic
  • 1986: Panasonic
  • 1987: Panasonic
  • 1988: Panasonic
  • 1989: Panasonic
  • 1990: Buckler
  • 1991: Buckler

Bibliografie[bewirk | brontekst bewerken]

  • Van Santander naar Santander (2000)
  • Valse start (2002) - verzameling NRC columns
  • Stoempwerk en andere verhalen (2004) - verzameling columns uit NRC en De Muur
  • Het snot voor ogen (2005)
  • Pedaalridder - de beste verhalen (2007)
  • Windbreker en andere verhalen (2008)
  • De Missie (2008) - 30-Minuten boekje bij een six pack Hertog Jan Grand Prestige bier

Brónne[bewirk | brontekst bewerken]

Referenties[bewirk | brontekst bewerken]

  1. Uitzending
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Peter_Winnen&oldid=349635"