Neusiedler Meer

Van Wikipedia
Gank nao: navigatie, zeuke

Dit artikel is gesjreve in 't Breuker. 't Weurt gewaardeerd óm in dit artikel 't Breuker aan te hauwe of aan te gaeve welk anger dialek gebroek is.


Lochfoto
Satellietfoto

't Neusiedler Meer (Duutsj: Neusiedler See, Hongaars: Fertő-tó) is e meer in 't grensgebeed va Oeësteriek en Hongarije. D'r naam kump van 't plaetsjke Neusiedl am See, wat ten noorde van 't meer likt. 't Is e zier óndeep sjteppemeer, mit 'n maximaal deepde va 1,8 meter. Daomit is 't meer 't óndeepste en nao 't Balatonmeer 't groeëtste sjteppemeer va Midde-Europa.

Geografie[bewirk | brontekst bewerken]

't Neusiedler Meer likt zoeëwaal op Oeësterieks es aoch op Hongaars sjtaatsgebeed. 't Groeëtste gedaelte likt binne Oeësteriek en daomit is 't 't groeëtste meer van dat land. Allewaal 't Bodenmeer groeëter is, is 't Oeësterieks aandael daova aevel väöl kleiner. Daonaeëve is 't aoch 't lieëgste punt van dat land.

De langwerpige vorm van 't meer daet dinke aan dat va 'ne sjoonlaepel. Va noord nao zuud is 't meer óngevier 36 kilometer lank en va oeëst nao wes tösje de zös en twelf kilometer breid. Gemiddeld is 't ongeveer eine meter deep, en op 't deepste punt sjlechs 1,8 meter. Aafhenkelik van d'r raeëge kint d'r watersjtand fosj sjtiege of zakke. 't Meer haat sjlechs ein revier die water aaveurt, de Wulka. Wiejer haat 't gein natuurlike aafveure en daomit is 't va oersjprunk 'n endoreïsch bekke. 't Gebuurt geweunlik neet dat 't meer druuëgvilt, aevel is dit vreuger waal ins vuurgekómme, vuur het lèts va 1864 pès 1870. Sinds 1895 waert d'r watersjtand geregeld doer 't Einserkanaal, wat via de Rabnitz oetmungt in de Donau. D'r watersjtand is 't hoeëgs i mieërt, èng augustus 't lieëgs.

Juus ten oeëste van 't Neusiedler Meer likt 'n anger meregebeed, d'r Seewinkel. Dit gebeed besjtaet oet tieëntalle óndepe meerkes die in d'r zoeëmer oetdruëge.

Kinmerke[bewirk | brontekst bewerken]

't Neusiedler Meer waert naeëve zien gering deepde gekinmirk doer zien mild en winderig klimaat en doer zien reetvelder. Brei reetkraeg ómgaeve 't meer aan alle kante. Bie 't plaetsjke Donnerskirchen is d'r reetkraag pès vief kilometer breid. Nao de Donaudelta is 't Neusiedler Meer 't groeëtste samehangende reetgebeed i Europa. Bie Podersdorf likt e reetvrie sjtrandgedaelte va twieë kilometer lengde. 't Neusiedler Meer is zier vösjriek. De unieke flora en fauna waere ónderstriep doer de beneuming van 't Neusiedler Meer tot UNESCO-Welterfgood.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Neusiedler_Meer&oldid=350118"