Mikro-ikkenemie

Van Wikipedia

Dit artikel is gesjreve in 'n ónbekènd dialek. Es doe wèts wat veur dialek dit is, weurt 't gewaardeerd óm dit aan te gaeve.


Mikro-ikkenemie is e deilgebeed vaan de ikkenomiesje weitesjap. 't Geit zich hiej óm de ikkenomiesje betrèkkinge tösje luuj, bedrieve, en de euverheid. Dit in teigesjtèlling tót de makro-ikkenemie, die zich beizig hauwt mit de globale ikkenomiesje variabele zowie 't nationaal perduk, de wèrkeloosheid, en de inflaasje.

In de mikro-ikkenemie weurt traditioneel oetgegange vaan twei soorte sjpeilers: consumente (luuj) en firma's (bedrieve). Vaan luuj numt me aon dat ze ein of anger verzaomeling veurkäöre höbbe veur sómmig gojer euver angere; vaan bedrieve weurt aangenómme dat ze gein veurkäöre vaan zichzelf höbbe, maor d'rop oet zeen om de wins ('t versjèl tösje inkaome en oetgave) zo groet mäögelik te hauwte.

Oet dees principes weurt dan in de theorie vaan de mert opgebouwd. In 'n ideaal mert is veur jeder good ummer eine pries, dae veur alle luuj en bedrieve geliek is, en 't weurt aangenómme dat bedrieve vriej zeen óm de mert op te kómme en aaf te gaon. Anger theorieje besjtaon veur neet-ideaal gevalle, zowie wienjae gein nuuj bedrieve toegelaote zeen, of gojer neet wiejerverkoch kènne waere.

't Groet succes vaan de mikro-ikkenemie is de realisaasje tót ein ongeorganiseerde mert vaan bedrieve en luuj die zich gedraoge wie 't zichzelf oetkump 't gedaon kriet tót een sosjaal optimale verdeiling vaan gojer besjteit, woebie 't neet mäögelik is emes baeter te laote waere zónger emes anges te benaodeile. 't Moot waal ummer begriepe waere dat dit resultaot aafhankelik is vaan aannaomes euver de effisjensje vaan de mert die mesjiens neet ummer waor zeen.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Mikro-ikkenemie&oldid=358120"