Meziek vaan Cyprus

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

De Meziek vaan Cyprus betaomt ziech bis de gaans muzikaol historie vaan 't eilaand Cyprus, dat allewijl besteit oet 't laand Cyprus en 't door beij Limbörge (en de res vaan de EU) neet erkènde Noord-Cyprus. De Meziek vaan Cyprus is dèks Grieks- of Törkstaoleg, meh allewijl ummertouw dèkser ouch Ingelstaoleg; dit deils umtot Cyprus 'n ex-kolonie vaan 't Vereineg Keuninkriek is, evels groetsdeils ouch umtot Ingels ummertouw mie de lingua franca is vaan de Europese popmeziek. In zien peuregheid, dös de Cypriotische volksmeziek, is Cypriotische meziek zoegood es 'ne rezjionaole variánt vaan de meziek vaan Griekeland, in vilt daorum bijnao ummertouw bis de Griekstaolege meziek of de Törkstaolege meziek.

Volksmeziek

Zoewie ierder gezach betaomt de Meziek vaan Cyprus in ziene volkszin veur e groet deil bis de meziek vaan Griekeland. Veural de versjèlle tösse dimotika (de volksmeziek vaan de Ionische Eilen) en Cypriotische volksmeziek is wiet te zeuke. Wel versjilt 't hendeg mèt de volksmeziek vaan 't Grieks vastelaand. 't Grieks vastelaand heet väöl invlooj oet de Balkan-meziek, dewijl die in Cyprus eigenlek vaan oersprunk neet te vinde is. Uniek is Cypriotische volksmeziek vaan boete de groete steij; die ziech kenmèrk door twie dinger die zoewel de meziek vaan Griekeland es die vaan Törkije neet höbbe: ze deile naomelek de ritmes en de toenledder vaan de Arabische volksmeziek, get wat veur de res nurges in Europa veurkump. De einegste Cypriotische volkszenger die in 't Cypriotisch dialek zink (in plaots vaan 't Staanderdgrieks) en ziech bekind heet kinne make boete Cyprus is Mihalis Violaris.

Klassieke meziek

't Gief neet väöl Cypriotische componiste in de historie vaan Europese klassieke meziek. Wel had Nicosia in 'n bepaolde middeliewse periood bekèndheid in Europa es 'n vlöchoord veur Europese componiste, veural in de periood vaan 1359 bis 1432. Es resöltaot höbbe bekans alle bekènde componiste oet deen tied wel 'n tiedje in Nicosia geleef. Cypriote zelf oet deen tied mèt bekènde stökke gief 't evels neet. In de Renaissance kraog Nicosia obbenuits belaangstèlling bij Europese componiste, umtot 't mode in deen tied waor um Arabisch en Europese meziek mètmekaar te combinere. Heidoor woort Nicosia ein vaan de versjillende centra veur dees nui struiming die ziech 't leefs woj oontwikkele in de euvergaangsgebeeje vaan Europa en 't Middelooste. Eigelek gief 't ziech pas in de 20e iew bekènde Cypriotische componiste in de Klassieke Meziek, die ziech veural gebruke veur Europese cinema, zoewie Marios Joannou Elia en ALexia Vassiliou.

Popmeziek

Cypriote beginne ziech laankzaom meh zeker ummertouw bekinder te make in de Europese popmeziek en daoboete. Zie lieke, oondaanks hun klein inwoenertal, mesjiens wel 't Ingelstaoleg antwoord door weure op de vraog nao Mediterraonse popmeziek. Toch lieket 't allemaol meh meuizaom te gaon. In de jaore 90 stoond 't eilaand veural bekind um zien underground metal-scene, mèt sommege Europees befaomde bands in de metal-underground. In de jaore 2000 en 2010 beginne d'r laankzaom ziech bekinde indiebands te oontwikkele op 't eilaand, boevaan d'r eigelek meh drei band zien die hu broed kinne verdene mèt toure door de EU: Johnny & the Liars, Isaac's Cello en ScarlotSnowPrelute.