Marko Koers
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Mokers, es te dit dialek sjpriks.
Marko Ewout Koers (Meulehook, 3 november 1972) is 'ne veurmalige Nederlandjse atleet, dae gesjpecialiseerd waas in de middellange aafsjtenj, mèt name de 800 maeter en de 1500 maeter. Hae is neugevoudig Nederlandjs kampioen en haet noe (2011) nog ummer de Nederlandjse records in henj op de 1000 m (2.15,05) en de Èngelsje miel indoor (3.57,37). Hae deegh drei keër veur Nederlandj mit aan de Olympische Sjpele.
Biografie[bewirk | brón bewèrke]
Eësjte internationaal toernoje[bewirk | brón bewèrke]
Op jónge laeftied begoosj Koers mèt helloupe en al sjnel bookde hae successe op nationaal en internationaal jeugwedsjtrieje. Zoa naom hae in 1990 deil aan zien eësjte groate internationaal toernooj, de waereldkampioensjappe veur junioren in Plovdiv mer hae waas doe nog neet erg succesvol en woort op de 1500 m in zien serie zelfs oetgesjakeld. Naa aafloup weet hae dit aan de zjwaore lemietejach die aan dit toernooj veuraaf waas gegange, gekoppeld aan de sjpanning rónj 't eindj van 't sjoaljaor.[1]
Ein jaor later wiej de Limburger in 't Griekse Thessaloniki opnuuj mètdeeg aan de Europese jeugkampioensjappe waas hae al wat succesvoller. Nao in zien serie op de 800 m es tweëde te zeen geëindigdj in 1.53,39, raakde hae in de hauve finale verwikkeld in ein fel gevech en bleek hae in de sjlotfase neet opgewassen taenge ’t geweld van de anger luipersj. Mer euver ziene geloupe tied van 1.50,68 koosj hae redelik tevraeje zeen.[2] Datzelfde jaor kroog Marko Koers ein sjtudiebeursj en góng nao de Amerikaanse universiteit van Illinois.
Eësjte Olympische Sjpele en WK-ervaring[bewirk | brón bewèrke]
In 1992 kwalificeerde Marko Koers zich op de 800 m veur de Olympische Sjpele van Barcelona. Hiej dróng hae mèt eine tied van 1.46,88 in de series door tot de hauve finale, wo-in hae zevende woort in 1.52,53.
In 1993 wón hae mèt euvermach de 800 m op de Universiade in Buffalo. Hae bleef in 1.48,57 alle concurrente mèt bienao ein seconde de baas. Door dees resultate woort väöl van häöm verwach op de Waereldkampioensjappe atletiek van 1993 in Stuttgart woo hae mètdeeg aan de 800 m. 't Lökde häöm aevel neet óm de finale te haole. Naodat hae in de series mèt de hakke euver de sjloot in 1.46,40 es ein van de verlezende tiedsjnelste waas doorgedrónge tot de hauve finale, kaom hae hiejin óndanks ziene sjnelle tied van 1.45,90, net get te kort óm mèt zien viefde plaatsj de finale te haole.
Teleursjtèllinge[bewirk | brón bewèrke]
Ein jaor later, biej de Europese kampioensjappe in Helsinki, moch hae 't opnuuj probere en weer waas d'r van teveure väöl optimisme euver zien meugelikheje. Mer ouch noe kaom hae neet in de finale naodat hae in de hauve finale opnuuj viefde woort. In november 1994 moosj hae ein knee-operatie óngergaon wodoor zien veursezoen van 1995 verlaore ging en hae daodoor pas laat in dat sezoen, wo-in ’t WK op ’t programma sjtóng, in vorm waas. Op dat WK kaom hae dan ouch neet wiejer es deilname aan de series.
OS van 1996: bèste Nederlandjse atleet[bewirk | brón bewèrke]
In 1996 vertaengewoordigde Koers Nederlandj opnuuj op de Olympische Sjpele in Atlanta, deze keër op de 800m en de 1500 m. De 800m leet hae aevel sjete wiej bekènd waas gewore dat de eësjte runj op deze aafsjtand waas afgelas ómdat d'r neet genóg deilnummersj ware. Koers sjadde in dat dit zouw leije tot ein óngemein hel sjifting in de hauve finales en daoróm koos hae veur de 1500 m. Mer ouch hiej gong ‘t d'r hel aan toe. In de serie van Marko Koers woort zelfs de sjnelste eësjte runj oats op Olympische Sjpele geloupe. Toch euverleefde hae de sjlachting en góng mèt 3.36,06 es viefde sjnelste euver nao de eindjsjtried. Hiejin raakde hae aanvankelik door 't traag aanvankstempo ingesjlaote in 't dichte veldj van loupersj, mer wiej de Algerijn Noureddine Morceli, de latere winnaer, 't veldj mèt ein versjnelling oetein trok, koosj Koers flinke wins boke en eindjigde hae oetentelik op ein verdeenstelikke zevende plaatsj in 3.38,18.[3] Dit bleek achteraaf de bèste atletiekprestatie te zeen van de Nederlandjse delegatie in Atlanta.
Zilver mèt ein gouwe rendje[bewirk | brón bewèrke]
Op de Sjpele van 1996 waas gebleke dat Marko Koers noe zoawied waas gekómme dat hae biej de volgende belangrieke wedsjtriej veur ’t eëremetaal koosj mètdoon. Biej ’t WK van 1997 woorte häöm dan ouch opnuuj medajjekanse toegedich, mer veer zjwaor wedsjtrieje op de 800m in vief daag bleke nog net weer get teväöl van ’t goje. Mèt 'ne tied van 1.44,85 woort hae oetentelik zösde in deze wedsjtried gewónne door Wilson Kipketer in 1.43,38. ’t Teväöl aan wedsjtrieje wó hae in 't sezoen veuraafgaond aan dit WK hej geloupe, eisde hunne tol.[4]
In 1998 leek Koers biej 't Europees indoorkampioensjap in Valencia op dezelfde aafsjtand aevel regelrech op 't goud aaf te gaon, naodat hae in de finale op 50 maeter veur 't eindj de leijende Noor Vebjørn Rodal, regerend olympisch kampioen, wis te passere. Allebei hejje ze aevel gein raekening gehawwe mèt de jónge Duutsjer Nils Schumann, Europees jeugkampioen, dae aan de bènnekantj door ein piepklein gaetje kroop en mèt ein sjterke demarraasj in 1.47,02 nao 't goud sjprinde. Koers veraoverde door zien aanvallend loupe vlak achter Schumann de zilvere medajje in 1.47,20.
Derde olympisch optraeje[bewirk | brón bewèrke]
In de jaore die volgde naom Koers nog deil aan versjillende internationaal toernoje en hae moch zelfs in 2000 veur de derde keër mitdoon aan de Olympische Sjpele]] in Sydney, mer op de 1500 m euverlaefde hae mèt zien 3.39,42 deze keër de hauve finale neet. De lètste keër dat häöm dit waal lökde op ein groat kampioensjap waas op 't EK van 2002 in München, wo hae op de 1500 m achste woort.
Nao in 2003 nog tweë keër Nederlandjs kampioen 1500 maeter te zeen gewóre en nao in 2004 veur de lètste keër aan ein WK indoor te höbbe deilgenómme, zat Koers aan 't eindj van dat jaor eine puntj achter zien sjportcarrière.
Vervolges waas hae ènnige tied wirkzaam voor de Sjtichting Sjporttop en mentor van Kai Bloetjes. Allewiel is hae adviseur bedriefssjport (óm wirkgaeversj te helpe biej interne betrokkeheid en vitaliteit van wirknummersj) en begeleijt hae rolsjtooltennisster Aniek van Koot.
Palmares[bewirk | brón bewèrke]
Nederlandjse kampioensjappe[bewirk | brón bewèrke]
Outdoor
| óngerdeil | jaor |
|---|---|
| 800 m | 1994, 1995, 1997, 1999 |
| 1500 m | 2003 |
| veldjloupe (korte aafsjtand) | 1999 |
Indoor
| óngerdeil | jaor |
|---|---|
| 1500 m | 1997, 2000, 2003 |
Anger titele[bewirk | brón bewèrke]
- NCAA (National Collegiate Athletic Association) indoorkampioen 800 m - 1993
- NCAA kampioen 1500 m - 1993, 1996
Perseuënlikke records[bewirk | brón bewèrke]
Outdoor
| óngerdeil | prestatie | datum | plaatsj |
|---|---|---|---|
| 800 m | 1.44,01 | 22 augustus 1997 | Brussel |
| 1000 m | 2.15,05 (NR) | 16 juli 1997 | Nice |
| 1500 m | 3.33,05 (ex-NR) | 28 juni 1996 | Paries |
| 1 Èng. miel | 3.53,47 | 30 augustus 1996 | Berlien |
| 2000 m | 5.04,75 | 15 juni 1997 | Woluwe |
| 3000 m | 7.46,52 | 12 juni 1999 | Leide |
Indoor
| óngerdeil | prestatie | datum | plaatsj |
|---|---|---|---|
| 800 m | 1.46,43 | 9 mieërt 1997 | Liévin |
| 1000 m | 2.17,77 | 20 fibberwarie 1997 | Stockholm |
| 1500 m | 3.38,91 | 18 fibberwarie 2001 | Birmingham |
| 1 Èng. miel | 3.57,37 (NR) | 15 fibberwarie 2001 | Stockholm |
Óngersjeijinge[bewirk | brón bewèrke]
- KNAU jeugatleet van 't jaor (Albert Spree-Baeker) - 1991
- KNAU atleet van 't jaor - 1996, 1997
Referenties[bewirk | brón bewèrke]
- ↑ Uit Pech en matheid teisteren tegenvallende ploeg door Ed Siemensma (1990), gepubliceerd in Atletiekwereld nr. 13: KNAU
- ↑ Uit Duitsers en Britten heersen door Cors van den Brink (1991), gepubliceerd in Atletiekwereld nr. 13: KNAU
- ↑ Uit Koers loopt finale - Jaklofsky springt record door Cors van den Brink (1996), gepubliceerd in Atletiekwereld nr. 7: KNAU
- ↑ Uit Vooruitgang gaat sneller dan verwacht door Monne Reitsma (1997), gepubliceerd in Atletiekwereld nr. 8: KNAU
- Heere, A. en Kappenburg, B. (2000) 1870 – 2000, 130 jaor atletiek in Nederlandj Groenevelt b.v. ISBN 90-90-12867-0
- Werkgroep Statistiek KNAU (1991 t/m 2000, 2003 t/m 2007) Statistische jaorbeuk 90 t/m 99, 2001 t/m 2004 KNAU
- Werkgroep Statistiek KNAU (1997, 2000, 2003, 2005) Statistische Jaarboeken Indooratletiek - seizoenen 1996-1997, 1999/2000 t/m 2003/2004 KNAU
- Bijkerk, T. (2008) Olympisch Oranje De Vrieseborch ISBN 978-90-439-1201-3
- Werkgroep Statistiek KNAU (2008) Statistisch jaorbook Indooratletiek 2007/2008 KNAU
- Koers, M. (28-12-09) Perseuënlikke info