Mark Tuitert
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Mark Tuitert (Holten, gemeinte Rijssen-Holten, 4 aprèl 1986) is 'ne Nederlandse sjaatser. Heer is gespecialiseerd in de 1.500 meter, meh is geinen all-rounder, in tegestèlling tot de mieste sjaatsers op deen aofstand.
Leve[bewirk | brón bewèrke]
Tuitert greujden op in zien geboorteplaots Holten. In 1999 woort heer wereldkampioen bij de juniore. In 2001 debuteerden 'r op 't Europees volwasse kampioensjap, boebij heer nao de derde race droetlaog umtot heer op e blökske trejde. Pas in 2003 haolde heer dao succes mèt de broonze medalje. 't Jaor dao-op woort heer mèt groete euvermach (e wereldrecord punte) Europees kampioen. Heer maakde ouch deil oet vaan de ploog die in 2005 de ierste wereldkampioen bij de plogeachtervolging woort. Op datzelfde oonderdeil haolden 'r bij de Olympische Speule in Turijn de broonze medalje.
Nao slechte rizzeltaote in all-roundtournoje in 2006 en 2007 besloot heer allein mer nog op aofstande te rije, en wel de 1.000 en 1.500 meter. Op de lèsten aofstand haolden 'r al ieder gouwe medaljes in de wereldbekerwedstrije. Toch lieverde dat in ierste instantie nog gein rizzeltaote op: Tuitert bleef op de sprintaofstande en de 1.500 meter 'nen outsider. Gans oonverwach haolde heer op de Olympische Speule in Vancouver vaan 2010 'n gouwe medalje op de 1.500 meter. Heer versloog de groete favoriet Shani Davis en woort d'n ierste Nederlander sinds Ard Schenk (Sapporo, 1972) dee dat presteerde.
Tuitert woent intösse in Heerenveen. In de zomer deit heer aon skeelere.