Maartje Paumen
Dit artikel is gesjreve in 't Gelaens. 't Weurt gewaardeerd óm in dit artikel 't Gelaens aan te hauwe of aan te gaeve welk anger dialek gebroek is.
Maartje Paumen (Gelaen, 19 september 1985) is 'n Nederlands-Limbörgse hockeysjpeelster. Sins 2004 sjpeelt ze veur 't Nederlands vrouwe-èlftal.
[bewirk] Laeve
Paumen waor gebaore in Gelaen es kèndj van ènne aannummer en 'n kleuterleidster. Van kènjdsbein aaf waor ze door häör awwesj sjterk gesjtimuleerd in de hockeysjport. Häör aesjte club waor de HC Geleen. Later sjpeelde ze biej de Zitterd-Gelaense fusieclub HC Scoop. Häör definitieve óntdèkking kaom biej Oranje Zwart in Eindhove. In 2001, wie ze vieftjièn jaor waor, kaom ze biej dees club in 't A1-maedjesteam, mèr nog in 't zelfde sjpeeljaor wórt ze in 't regulier A-èlftal gezat. Nao drie jaor ging ze nao HC Den Bosch, wat toen, wie noe nog ummer, oppermèchtig waor in 't Nederlands vrouwehockey. Ouch in 2004 maakde ze häör debuut in 't Nederlands èlftal op 't toernooj óm de Champions Trophey in Argentinië dat toen ouch gewónne wórt. Ze sjpeelde wiejer ónger mjaer op 't WK Hockey van 2006 veur vrouwluuj en op de EK's van 2005 en 2007.
Häör techniek wirt dèkser vergeleke mèt die van Mijntje Donners, mèt wae ze in Den Bosch same sjpeelde. Häör sjpecialiteit is score oet ènne sjtraofcörner. Biej dat lètste EK in 2007 leep ze aevel bie 't numme van zwou ènne sjtraofcörner 'n serieuze blessure op. Achteraaf bleek die minder erg es gedach en hersjtèlde vriej sjnèl zwoadat ze zónger probleme koosj mètdoon aan de Olympiesje Speele in Peking. Op dat toernooi, wat 't Nederlands èlftal oeteindelik zouw winne, wórt ze topscorer met 'n veur Nederland óngekèndj totaal van 11 gole, allemaol gescoord oet ènne sjtraofcörner. Ze kreeg de gouwe medalje oetgereik door prins Willem Alexander.
In augustus 2009 voogde Maartje mèt häör Nederlands team 'ne nuje titel aan häör palmarès toe, noe woort ze in Amstelveen Europees kampioen door in de finale de Duutsje hockeysters mèt 3-2 te versjlaon.
[bewirk] Extern links
- Portret en interview in 't NRC Handelsblad (Nederlands)
- Berichte euver Maartje Paumen op Topsportlimburg.nl (Nederlands)
