Leo Kierkels

Van Wikipedia
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Baoksems, es te dit dialek sjpriks.

Leo Petrus Gerardus Kierkels (Baexem, 12 december 1882 - Roame, 7 november 1957) waas 'ne Nederlandse roams-katholieke geistelike.

Biografie[bewirk | brón bewèrke]

Kierkels waas de eësjte zoon van Laurentius Kierkels (22-2-1858 - 22-1-1930) en Catharina Hubertina Ronckers (18-11-1856 - 7-7-1929). Op jónge laeftied verhoesde hae nao ’t Limburgse Haele. Op 23 mei 1899 woort hae in Ere (Belsj) biej Doornik es frater Leo geprofest in de Congregatie van de Passioniste. De preesterwiejing óntving hae op 22 december 1906 in Brugge (Belsj) wonao hae in Baexem zien eësjte mes opdroog. Hae voltoajde zien sjtudies in Roame en woort aangesjtèld es perfessor in de filosofie aan 't internationaal Sjtudiehoes van de Congregatie in Roame. In 1915 woort hae aangesjtèld es algemein Secretaris en in 1920 es generaal-procurator. In 1925 woort hae gekaoze tot Generaal van de Congregatie van de Passioniste. Hae woort op 26 april 1931 in Roame door Kardinaal van Rossum tot bisjop gewied, wobiej hae es waopesjpreuk koos: "Quae sursum sunt, quarite". Op 22 december 1956 biej de viering van zien 50-jaorig preesterfeës woort hae ouch beneump tot Commandeur in de Orde van Oranje Nassau.

Monseigneur Leo Petrus Kierkels (Passionist) woort beneump tot Titulair Aartsbisjop van Salamina en in 1948 woort hae ouch beneump tot Internuntius van India. Hae waas bevrundj mèt Pandith Nehru en anger groatheje, hindoes zoawaal es moslims.

De volgende titels haet hae maoge veure: Apostolisch Delegaat van Brits-Indië, Birma, Ceylon en Malakka, Consultor van de Congregatie veur de Veurtplanting van 't Geluif, Consultor van de Congregatie veur de Religieuze, Consultor van de Congregatie veur Boetegewoon Kirkelike aangelaegeheje, Awt-Generaal van de Congregatie van de Passioniste, Commandeur in de Orde van Oranje-Nassau.

In Baexem (Leudal) is ein plein nao häöm verneump, 't Mgr. Kierkelsplein.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Leo_Kierkels&oldid=434035"