Kleingenhout

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Hölsbergs, es te dit dialek sjpriks.

---

Mergele carréboerderie oet 1759

Kleingenhout ies 'n sjtraotwiek van Arensgenhout in Hölsberg, in de gemeinte Baekdale in Zuud Limburg. Allewiel kiek 't oet op de autobaan A 79. 't Weurt aangegeve door 'n wiet plaatsnaambord. De naam kump van hout, dat 'n ope plek in 'ne bösj (Ravesbösj) beteikent. 't Woord klein ter óndersjeiing van Arensgenhout.

De Kattebaek óntsjpringk hie in de buurt. Via De Sjtoepert zal ze twiè kilomaeter wiejer in Valkeberg in de Geul oetmónde.

Klein-Genhout ies 'n ander gehuch, dat same mèt Groat-Genhout 't kèrkdörp Genhout in de gemeinte Baek vörmp.

Bezeenswaerdig

• 'n Paar mergele boerehoezer en häöf en 'n vakwerkhoes.
• de Heihaof (Heihof)
• Op de krusing Pötwaeg, Heihaofwaeg en Kleingenhoutersjteeg sjteit 'n baksjteine kapelke gewiejd aan Slevevrouw van Fatima. Ze ies in 1954 geboewd es rösplaats veur de Sacramentsprocessie, die um de drie jaor door Kleingenhout trèk.