Klómp

Van Wikipedia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


't Make van blokke klómpe

'ne Klómp ies 'ne sjoon van hout. Vreuger waor 't gans normaal um op klómpe te loupe. Allein notabele lepe op laere sjeun. Allewiel were klómpe neet zoa väöl miè gedrage, mèt oetzóndering van boere en luuj die op 't land of in de tuin wèrke. Klómpe were in 't boeteland dèks gezeen es typisch Hollands.

Soorte klómpe[bewirk | brón bewèrke]

Ouwerwètse klómpe woorte gesjtoke oet eine blok zach hout, meistal van de wiej (wilg) of populier. De zool waor doemediek, zoan twiè tot twiè en 'ne hauve centimaeter.

  • De gewoon blokke klómpe were oet eine blok hout gemaak
  • Vreuger woorte ouch lièg klómpe gedrage. Die houwe 'ne laere klómpereem euver de wreef van de voot, dae vasgezat waor mèt speciaal klómpenegelkes. Wat dat lièg model klómp betrof koes me keze tösje:
    • mansklómpe. Mansluujklómpe houws se ouch in 't broen-geruik. Door dat ruike koeste ze beter tege voch.
    • vrouweklómpe. Vrouweklómpe waore extra liech en lièg van vörm en meistal zjwart geverf mèt ingekretsde lienfigure. Ouch de laere band waor zjwart.
    • jónges- en maedsjesklómpe
    • klumpkes veur kinger.
  • Dao zint ouch houte klómpe mèt 'n ganse laere kap.
  • Gezóndheidsklómp: houte sandaal mèt laere reem.
  • Qua model huèrt de Crock bie de categorie klómpe, meh hae ies van gekleurd plastic en hièl liech te drage.

Gelle koes me in de winkel of bie de klómpekrièmer dae langs de deur kaom mèt sjtapele van 13 paar, dat wilt zègke: ein dozien + ein reservepaar veur 't geval d'r in 'ne klómp 'n verborge fout zoot.

Loupe op klómpe[bewirk | brón bewèrke]

't Loupe op klómpe gebeurt gans andersj es op sjeun. Door bie 't luuchte van de voot de tiène krómp te trèkke weurt de klómp aan de voot gehoute. Deis se dat neet, dan verluus sen 'm. In 't begin deit 't drage get pien op de wreef.

Limburgse sjpreekweurd en gezèkdes[bewirk | brón bewèrke]

  • "Dae löp met de (voel) klómpe dedoorheen": emes nump 't neet zoa (ge)nauw.
  • "Dao briek miech de klómp", weurt gezag es se perplex sjteis.
  • "Op 'ne klómp en 'ne sjloeb 't dörp inkómme" zag me van emes dae bekans zien gans bezit kwiet waor.
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Klómp&oldid=439284"