Kindersjrik
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
'ne Kindersjrik is e fenomeen oet de volkscultuur, mie bepaold in volksverhaole. 't Is 'n figuur woevaan 't bestoon aon kinder weurt vertèld veur te veurkoume tot die oongewinsde dinger doen. Es e keend beveurbeeld neet nao bed wèlt of zien ete neet opit, zal de kindersjrik langskoume.
De in de Lieg Len meis veurkoumende kindersjrik is de boeba, in Noord-Limburg ouch wel beukèl geneump. Wie dee perceis oetzuut en wat 'r deit ligk neet vas, meh aofsjrikwekkend is 'r wel. Veur erger oongehoerzaamheid kinne awwers nog mèt de werewouf dreige. Wee bij 't water geit speule moot oetkieke veur de nekker of de haokemaan, 'ne geis dee diech 't water in trèk es 'r zin heet. In 't koreveld hojzde de korewouf, eigelek gewoen 'n hamster, woemèt gedreig woort. Nachbieste, wie de vleermoes en de uil, weure ouch gebruuk: dees bieste zien van hun eige al hendeg angswekkend. In de Sinterklaostied weurt ouch Zwarte Piet es kindersjrik gebruuk. Teslotte gief 't talloze variante, dèks in de vreemste vörm, wie de naaksluiper of de tienesnijer.
De kindersjrik, dee inmiddels bekans is oetgestorve umtot 't kinder te sjouw zouw make, kump bijnao ummer veurt oet volksgeluif, wat weer trökgeit op de veur-christeleke Germaanse religie. Nao 't inveure vaan 't christendom storf 't Germaans pantheon snel oet, meh bleve relikte vaan de religie nog hiel laank euverind es bijgeluif, zeker op 't platteland. Dat góng soms zelf zoe wied tot de Kèrk 't officieel erkinde. Op 't platteland zal 't zeker tot wied nao de Middeliewe gedoord höbbe tot 't bijgeluif verdween, en wie me dao in 't begin vaan de twintegste iew oonderzeuk nao deeg waor 't nog neet gans verdwene. Wel waore de meiste vörm vaan bijgeluif verawwerd en neet mie geaccepteerd door 't groetste deil vaan de bevolking. Es relik gebruukde me de notie vaan die figure tegeneuver kinder. De grens tösse wat de awwers zelf geluifde en wat inkel gezag weurt veur de kinder sjouw te make is neet sjerp.
