Ieslands hierevoetbalèlftal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Iesland en Slowakije veuraofgoond aon 'ne vrundsjappeleke match in 't Laugardalsvöllur in Reykjavík.

't Ieslands hierevoetbalèlftal (bijgenaomp Strákarnir okkar) vertrejt Iesland op internationaol voetbalwèdstrije. 't Team weurt gereguleerd door de Iesland voetbalboond (Knattspyrnusamband Íslands, KSÍ) en späölt sinds 1946 officieel wèdstrije. Door zien gering bevolking had 't team noets väöl succes. In de jaore 2010 kaom hei evels radicaol verandering in.

Historie[bewirk | brón bewèrke]

Iesland waor tot 1944 e landsdeil vaan Denemarke en had gein officieel, bij de FIFA aongeslote èlftal. 'n Oonofficieel èlftal bestoont wel; dit späölde in 1930 tege de Faeröer (0-1 wins). In 1946 volgde de ierste officiële wèdstrijd, tege 't aajd mojerland Denemarke; Iesland verloor mèt 0-3. 't Land moch in 1954 neet mètdoen aon 't WK en kós ziech in 1958 neet kwalificere. Ze zouwe ziech pas vaanaof 1974 standaard veur WK's en EK's insjrieve.

Succes had 't team neet; de interlands vaan Iesland waore ummer boete de zomer, in kwalificatiematches, veur gein al te groet publiek. In 1996 hadde ze 'nen opmerkeleke primeur, wie tege Esland Eiður Smári Guðjohnsen in dezelfde wèdstrijd späölde es ziene pa Arnór Guðjohnsen. Vaanaof dezen tied begóste de prestaties veurziechteg te verbetere. Scouting en training vaan de jäög woorte zier serieus t'r haand genome um de klein talentepool tot 't uterste te benötte. Veur 't EK vaan 2004 lökden 't bekans um de play-offs te hole. Ouch gónge neet wieneg speulers voetballe in (middel)groete voetballen (in 't Belsj beveurbeeld Sverrir Ingi Ingason, in Nederland Kolbeinn Sigþórsson en Alfreð Finnbogason).

Alles begós op ziene plaots te valle nao de koms vaan de Zweedse trainer Lars Lagerbäck in 2011. Veur 't WK vaan 2014 haolde ze de play-offs (boe-in vaan Kroatië woort verlore). In de kwalificatie veur 't EK vaan 2016 woorte ze ierste in 'n poule mèt oonder mie Nederland (wat twie kier verslage woort), Tsjechië en Turkije. Naotot ze zoe 't EK haolde, volgde nui stunts door 't hole vaan de achste finaal en nao wins op Ingeland zelfs de kwartfinaal. Ouch veur 't WK vaan 2018 wiste ze ziech te plaotse; hei kaome ze oondaanks e geliekspeul tege Argentinië neet door de poulefaas.