Hub Dohmen (Limburgstalige dichter)

Van Wikipedia

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.


Hub Dohmen (1923-1979) oet Heële.

Hub Dohmen (Heële 1923-1979) woar inne activis vuur 't behoad van 't Limburgs dialek en sjriever oet Heële.

Hubertus Wilhelmus Josephus Dohmen (Limburgs: Doame), geboare op Heëlebaan, woar va 1957 bis ziene doeëd i 1979 sikkertaris-penningmeester va d'r Limburgse dialekverein Veldeke. I de fieftiger en sestiger joare publiceerde heë ruum hóngerd artikele uëver de gesjiechte en ouw volksgebroeke va Zuud-Limburg.

Sjtöälke[bewirk | brón bewèrke]

Ónger 't pseudoniem Hubert van Caumer sjreef heë i de joare 70 óch regelmieësig gedichte in 't tiedsjrif va d'r dialekverein Veldeke. Zieng gedichte woare deks melancholisj, wie good te zieë is a zie gedich Wat woar en neet mieë is.

De daag sjpówwe zich vuurbij
wie auto's op 'n autobaan.
Van vreugjoar noa zoeëmer,
van herfs noa wingkter.

't Leëve geet wier,
mit of zónger ós.
Ouwer en messjie wieëzer gewoeëde
dinkt me, ooch dek mit ironie
an wat woar en neet mieë is.

Leëve en doeëd,
ze ligke zoeë kót neëve ee
es twieë geleefde i ge bed.

Anger wirk[bewirk | brón bewèrke]

Doaneëve wirkde heë joarelank an inne Heëlesje dictionnair, meh durch ziene onverwachse doeëd is dat book d'r noeëts gekómme. Wöad oet zieng lieste zint geïntegreerd in 't Heëlesj Woadbook, dat i 2000 durch Veldeke Heële oetgegeëve is. Noeëts oetgegeëve is ing lies mit 438 Heëlesje oetdrukkinge, getiteld Alles geet vuurbij.

Dohmen houw i Heële i de joare 70 óch ing bekinde kunsgalerie woeë kunsteneers va binne en va boete Limburg wie d'r Jef Diederen, Ger Lataster, Aad de Haas, Lucebert, Sjef Hutschemakers, Harry Koolen, Lei Molin en Rob Brouwers exposeerde.

Get publicaties[bewirk | brón bewèrke]

  • De Hoakebuuët va Booches, het feestelijk 'invaren' van de laatste oogstwagen in Bocholtz, Heële 1960.
  • Meigebruiken in Zuid-Limburg, een historisch-volkskundige beschouwing over meigebruiken in Heerlen, Schinveld en Wijnandsrade, Heële 1961.
  • Naam en oorsprong van het geslacht Jaspar, genaamd L'Ortye, Heële 1970.
  • Urges, de Heerlense gedichten van Hubert van Caumer, Heële 2010.