Hillegersberg-Schiebroek

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Ligking vaan Hillegersberg-Schiebroek in de gemeinte Rotterdam.
't Stadsdeil vaanoet de loch.

Hillegersberg-Schiebroek is e stadsdeil vaan de Nederlandse gemeinte Rotterdam, gans in 't noorde. 't Besteit oet de groond vaan de aw gemeintes Hillegersberg en Schiebroek, die in 1941 door Rotterdam woorte geannexeerd. Me vint hei de aw bebouwing vaan die twie gemeintes, meh veural ouch nuibouwwieke oet versjèllende decennia vaan d'n twintegsten iew, zoewel vaan veur es nao de annexatie. Hillegersberg-Schiebroek is e waterriek en greun stadsdeil mèt 'n rillatief welvaorende bevolking.

Historie[bewirk | brón bewèrke]

Hillegersberg waor e lintdörp wat ziech vaan kortbij Rotterdam tot in Bergschenhoek oetstrekde. Iewelaank had 't 'n agrarisch bestoon, wat evels door de vervening woort oondermijnd. Schiebroek waor einen inkele polder aon de Kleiweg, 'nen doorgoonde weeg door 't Schieland. Pas in de negentienden kaom 't agrarisch karakter vaan de buurt oonder drök te stoon, wie 't sterk in inwoeners touwnummend Rotterdam begós oet te breie. In väöl aonligkende gemeintes versjeen veursteideleke bebouwing. Rotterdam annexeerde dee groond liever zelf; zoe góng in 1904 't zuielek deil vaan Hillegersberg nao de groete naoberstad.[1] Dees wieke hure allewijl neet bij Hillegersberg-Schiebroek, meh bij Noord.

Oonderwijl góng de bevolkingsgreuj vaan Hillegersberg door, en begós in Schiebroek 't zelfde perces. In 1941 annexeerde Rotterdam dees bei gemeintes gans, tegeliek mèt Overschie en IJsselmonde. Nao d'n Twiede Wereldoorlog bouwde dees stad de ein nao de aander wiek en verloor 't gebeed zien agrarisch karakter. De recreatief functie vaan de waterpeul bleef evels behawwe, zoe good wie de typische villa's veur de Rotterdamse elite die 't veur d'n oorlog al gaof.

Indeiling en karakter[bewirk | brón bewèrke]

Hillegersberg[bewirk | brón bewèrke]

Hoofartikel: Hillegersberg

De wiek Hillegersberg, kort-eweg Berg en in de Rotterdamse administratie ouch Hillegersberg-Noord geneump, umvat de aw dörpskern en de bebouwing dao oonmiddellek umheen. Dit stadsdeil weurt gedomineerd door twie pole, de Bergse Voorplas en Achterplas. In 't dörp zien versjèllende monuminte te zien, wie de kestielrewien vaan 't Huis ten Berghe, de aw kèrk en get hoezer dao roontelum. Ouch vint me hei wie gezeg villa's.

Honderd-en-Tien-Morgen[bewirk | brón bewèrke]

Noordnoordoostelek vaan 't aajd dörp in de gelieknaomege polder. Dee polder is in 1772 druuggelag en geneump nao zien oppervlaakde vaan 110 mörge ofwel 85 hectaar. 't Zuielek deil is in de jaore 1950 gebouwd en besteit oet veur deen tied ruim rijkeshoezer en middebouw (lieg flats). Nao zèsteg jaor zien väöl hoezer aon vervaanging touw; hei en dao is ouch al gesloop en nuigebouwd. 't Noordelek deil woort pas in de jaore 1990 gerealiseerd en in 'n Vinexlocatie. In gans de polder heite de straote nao gaode en helde oet de Grieks-Romeinse aajdheid.

'n Bezunderheid in dees wiek is de Ajaxstraat. Allewel tot ouch zij is geneump nao 'ne Grieksen held (Ajax), heet dees straot veur groete reuring in de stad gezörg. Umtot de Amsterdamse voetbalclub Ajax d'n traditionele rivaol vaan Feyenoord is, eise väöl lui 'n naomsverandering; sommege facteurs riffesere zelfs hei pos te bezörge.

Kleiwegkwartier[bewirk | brón bewèrke]

In officieel stökker Hilleberg-Zuid geneump. Dit is evels 'ne verwarrende naom, umtot 't neet allein gebeed vaan 't vreuger Hillegersberg umvat me ouch de vreugere kern vaan Schiebroek. Wie me begriep besteit oet de Kleiweg en umgeving, wat neerkump op 't zuielekste deil vaan de Schiebroekse polder en de zuieleke bebouwing vaan Hillegersberg, zoewel de lintbebouwing aon de Straatweg wie de later (nog oonder Hillegersbergs bewind) gerealiseerde nuibouwwieke.

Molenlaankwartier[bewirk | brón bewèrke]

Noordoostelek vaan de Hillegersbergse kern. Vaanaof de jaore 1930 tot decennia later oontwikkeld roond de Molenlaan. Hei vint me veural hoezer veur de hoeger middeklas.

Schiebroek[bewirk | brón bewèrke]

Hoofartikel: Schiebroek

Hei-oonder versteit me allewijl veural 't deil wat Rotterdam gebouwd heet. Die stad bouwde hei in de polder in de jaore 1950 e tuindörp. Vaan alle wieke in Hillegersberg-Schiebroek heet allein Schiebroek 't karakter vaan 'n volksbuurt. E deil vaan de polder, in 't noorde, is ouch noe nog oonbebouwd en weurt veur landbouw en sportvelder gebruuk.

Terbregge[bewirk | brón bewèrke]

'n Aajd gehuch aon de Rotte, vaanajds vallend oonder Hillegersberg meh kilometers oosteleker gelege. Geneump nao 'n brögk, door Ingweoonse oontrunding veranderde brugge in bregge. Kaom in de negentienden iew gans in 't water te ligke; allein de Rottekaoje waore gespaord. Later deen iew woorte die pole druuggelag. Stroumaofwaarts vint me noe ouch get nuibouw (bekind es Nieuw-Terbregge), zoetot dees wiek sterk in umvaank is touwgenome. Zie lendelek karakter is 't evels neet kwietgeraak. Terbregge is lendelek veural bekind vaan 't knouppunt Terbregseplein, wat hei in de buurt ligk (meh oonder 't stadsdeil Prins Alexander vèlt).

Verkier[bewirk | brón bewèrke]

Oongeveer op de zuidgrens vaan 't stadsdeil löp d'n A20, dee vaan 't Westland nao Gouda veurt (boe me weer nao Utrech en wijer oostelek kin). Kortbij de groete weeg vint me ouch statie Rotterdam Noord, 'n stopstatie aon de lijn vaan Rotterdam nao Utrecht (en wijer). Tot 2010 leep door Hillegersberg-Schiebroek nog 'ne spoorweeg, de Hofpleinlijn, dee vaanoet D'n Haag nao statie Hofplein in 't Rotterdams centrum leep. Dees lijn had 'n statie aon de Kleiweg. In dat jaor is dees lijn umgeleid en aongeslote op de Rotterdamse metro; same heite ze allewijl Randstadrail. In Schiebroek zien dao noe twie staties vaan: Meijersplein en Melanchtonweg. Wijer kump d'n tram door Schiebroek, 't Kleiwegkwartier en Hillegersberg.

Politiek[bewirk | brón bewèrke]

Wie de aander stadsdeile waor Hillegersberg-Schiebroek tot 2014 'n deilgemeinte. In dat jaor woorte de bevooghede vaan de stadsdeile sterk beperk en veranderde de deilraod in 'n bestuurskemissie. De oetsleeg vaan de recinte verkezinge waore de volgende:

Partij 2006 2010 2014
D66 - 2 3
VVD 4 4 2
Leefbaar Rotterdam 5 4 2
Bewoners!
Hillegersberg-Schiebroek
- - 2
PvdA 5 4 1
SP - - 1
GroenLinks 2 2 1
CDA 2 2 1
OPLW 1 1 -
Totaol 19 19 13

In 2006 bestoont 't colleesj oet PvdA, GroenLinks, CDA en OPLW, in 2006 oet VVD, Leefbaar Rotterdam, D66 en CDA.

Bevolking[bewirk | brón bewèrke]

In Hillegersberg-Schiebroek woene 'n gooj 40.000 lui. In 2012 woorte hei 42.870 inwoeners getèld. Schiebroek waor de volksriekste buurt mèt 15.940 inwoeners, daonao volgde Hillegersberg-Noord (7.970), Hillegersberg-Zuid (Kleiwegkwartier; 7.775) en 't Molenlaandkwartier (7.755); de kleinste wiek waor Terbregge (3.435).[2] (Alle getalle zien aofgerund op ganse vieftalle.) Opvallend is tot Honder-en-Tien-Morgen in dees ciefers oontbrik; 't kin bij Hillegersberg-Noord zien getèld.

Etnische samestèlling[bewirk | brón bewèrke]

72% vaan Hillegersberg-Schiebroek is otochtoon; de hoegste score in de stad Rotterdam. Allein Pernis, Hoek van Holland en Rozenburg, officieel dörper in de gemeinte Rotterdam en gei deil vaan de stad, zien nog homogeender. 't Stadsdeil kint wijer 12% westerse allochtone en 16% neet-westerse allochtone, vaan wee 3%pt. Marokkaone, 2%pt. Antilliaone, 4%pt. Surinamers, 2%pt. Turke en 5%pt. lui vaan aander heerkoms. Vaan de versjèllende wieke in 't stadsdeil is Schiebroek wiedoet 't gemêleerdste: 10% vaan de bevolking is hei westers allochtoon, 26% neet-westers. In 't Molenlaankwartier vint me de minste allochtone: 14% westerse en 5% neet-westerse.[2]

Bronne[bewirk | brón bewèrke]

Dit artikel is deils gebaseerd op, meh neet vertaold oet, 't corresponderend Nederlandstaoleg artikel, en wel in dees versie.

Rifferenties[bewirk | brón bewèrke]

  1. Grote Winkler Prins, zevenden drök: dl. 16, p. 562
  2. 2,0 2,1 CBS Statline - Inwoeners en allochtone in Hillegersberg-Schiebroek

Externe link[bewirk | brón bewèrke]

Rotterdam: Sjtadsdeile, opgelufde gemeintes en dörpsgemeinsjappe

Centrum (Cool) | Charlois (Heijplaat) | Delfshaven (Oud- en Nieuw-Mathenesse) | Feijenoord (Katendrecht) | Hillegersberg-Schiebroek (Hillegersberg · Schiebroek · Terbregge) | Hoek van Holland | Hoogvliet | IJsselmonde | Kralingen-Crooswijk (Kralingen) | Noord | Overschie | Pernis ('s-Gravenambacht) | Prins Alexander (Kralingse Veer) | Rozenburg (Blankenburg)