Henriëtte d’Oultremont de Wégimont

Van Wikipedia
Gank nao: navigatie, zeuke
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Mestreechs, as te dit dialek sjpriks.

Henriëtte op 'ne foto oet 1862

Henriëtte Adriana Ludovica Flora gravin d'Oultremont de Wégimont (Mesjtreech, 28 fibberwari 1792 - Aoke, 26 oktoaber 1864), Gravin van Nassau, waas de tweëde echgenote van de keuning van 't Keuninkriek der Nederlande, Willem I Frederik van Oranje-Nassau.

Henrica Adriana Ludovica Flora Rijksgravin d'Oultremont de Wégimont (of Henriëtte Adrienne Louise Florée d'Oultremont de Wégimont) waas de dochter van de Waalse H.R. Rieksgraaf Ferdinand L.F.M. d'Oultremont de Wégimont en de Wageningse admiraalsdochter Johanna Susanna Hartsinck. Zie woort gebaore in de Breisjtraot in Mesjtreech. [1] Oet 't huwelik van häör awwesj woorte nog tweë zeuns en tweë döchtesj gebaore. Oet 't eësjte huwelik van häör moder mèt Dirck de Smeth (1754-1779) waas in 1779 al eine zoon Theodorus gebaore. Deze Theodorus woort later Heër van Deurne, Liessel, en Alphen en Rietveld. [2]

Door de verdeenste van häöre groatvader, dae vice-admiraal waas, kaom zie in aanmerking veur 'n hoffunctie, ómdat keuning Willem I ouch luuj oet de zudelike Nederlanden aan 't hof wouw aansjtèlle. Henriette woort hofdame van keuningin Wilhelmina ("Mimi" van Pruse) en ouch Henriëttes zöster Pauline en häör breurs Charles en Ferdinand ware aan 't hof verbónje. Henriëtte waas oetgelaote van aard en veel daoróm van 't begin aaf aan in de sjmaak bie 't vorstepaar. Keuningin Wilhelmina euverleej in oktoaber 1837. De vereinzaamde Willem I deeg Henriette in 1838 'n huweliksaanzeuk. Zie aanvaarde de aanzeuk, al hèj zie aanvankelik ouch bedènkinge.

't Veurgenómme huwelik hèj völ opsjödding veroarzaak, ómdat de wortele van Henriëtte deils in 't net aafgesjeije Belsj laoge, baovedeen waas zie ouch nog van kathelieke hoeze. Zelfs ziene zoon, kroanprins Willem II, prebeerde häöm van van zien huwelik mèt Henriette te weerhawwe. Pas nao 't aaftraeje in 1840 van Willem I waas 't meugelik 't huwelik door te zètte. Op 17 fibberwari 1841 trouw Henriëtte op 49-jaorige laeftied mèt de 68-jaorige Willem I. Biej häör huwelik kroge häöre man en zie de titele Graaf en Gravin van Nassau. 't Paar vestigde zich in 't paleis Unter der Linden in Berlien.

Henriëtte d'Oultremont woort sjpottend ouch waal 'Jetje Dondermond' geneump. In 1862 woort zie gefotografeerd in Paries (zuug foto hiejnaeve). In 1864 overleej ze op kesjteël Rahe in Laurensberg biej Aoke, 72 jaor awt. In taengesjtèlling tot häöre man, de ex-keuning, woort Henriëtte neet begrave in de keuninklike graafkelder in Delft, mèr in häör femiliegraaf in Wégimont (biej Ayeneux) in de gemèngde Soumagne.

Trivia[bewirk | brontekst bewerken]

  • 't Café La Patraque in de Platielsjtraot in Mesjtreech zouw nao Henriette d'Oultremont zeen geneump. Zie neumde zichzelf op hoage laeftied La Patraque (=awwe rammelkas). 't Café laog aan de achterkantj van häör gebaortehoes aan de Breijsjtraot. [3].

Referentie[bewirk | brontekst bewerken]

  1. http://www.rhcl.nl/data/files/algemeen/Archiefsprokkel%20%20Henriette%20d'Oultremont.pdf.
  2. Keunen, L., 1994. De verbintenis van de heren van Deurne met het huis "Van Oranje-Nassau", D’n Uytbeyndel. Periodiek van Heemkundekring H.N. Ouwerling – Deurne, nr. 30, p. 14-16 (herfst 1994).
  3. De Maaspost 17 juni 2009

Externe Link, brónne[bewirk | brontekst bewerken]