Hans Erkens

Van Wikipedia
Gank nao: navigatie, zeuke
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Sjènnes, as te dit dialek sjpriks.

Hans Erkens (Sjènne, 14 juli 1952) is eine veurmalige Nederlandse voetballer en voetbalmanager, dae ónger meë veur AFC Ajax haet gesjpeeld (juli 1976-juni 1979).

Erkens is de awtste zoon van Jan Erkens en Mil Erkens-Bindels, die in Sjènne aan de Dörpssjtraot eine iezerwarewinkel hejje wo-in Hans regelmaotig mithólp. Op jónge laeftied góng hae voetballe biej de plaatsjelikke voetbalvereiniging SV Schinnen, die häör terrein hej aan de Krekelberg. Naodat hae door eine scout waas óntdèk veur ’t betaald voetbal, kaom hae in Zitterd biej Fortuna SC in de jeugopleijing terech. Al gaw waas hae good genóg veur ’t eësjte wo hae es rechsboete ein van de sjmaakmakersj van ’t èlftal woort. In de zomer van 1976 maakde hae de euversjtap nao Ajax wo hae drie jaor zouw sjpele.

In mieërt 2006 sjtarde Hans Erkens es topman in de raod van commissarisse biej zien aw voetbalclub Fortuna Sittard. Biej dees vereiniging heat hae vanwaege de financiële situatie op ein gegaeve mement toegewirk nao ein fusie mèt ein of meërdere Limburgse betaald voetbalclubs. Op 2 april 2009 woort bekènd dat Fortuna Sittard, mede ónger drök van de KNVB en de Previncie Limburg, zouw gaon fusere mèt Roda JC tot Sporting Limburg. Dees fusieplanne zint aevel ein waek later sjtopgezat nao hevige proteste van de supportersj van allebei de clubs, wodoor Fortuna Sittard toch nog es zelfsjtendige voetbalclub in ’t betaald voetbal wiejer góng. Es gevolg van de door Hans Erkens genómme acties sjtóng hae al vanaaf zien aantraeje biej Fortuna es leijend persoan op gesjpanne voot mèt de supportersj van de club. 't Aansjture op de fusie leijde op ein gegaeve mement tot vernelinge aan zien hoes en ziene auto en zelfs tot doadsbedreiginge aan zien adres en zien femielie. Op 14 april 2009 woort bekènd dat hae per direk opstapde biej Fortuna Sittard.[1]

Erkens woont same mèt zien vrouw Door en zien tweë kènjer nog ummer in Sjènne, en is anno 2005 directeur van Hans Erkens Events, ein bureau dat evenemènte organiseert mèt ein sjportief tintje. Ouch presenteert hae op de regionale televisie ein reisprogramma veur ein locaal reisbureau. Hae is ouch nog coach van SV Schinnen, de lokaal voetbalclub van zien woonplaatsj.

Referenties[bewirk | brontekst bewerken]

  1. "Erkens weg bij Fortuna", De Limburger, 14 april 2009
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Hans_Erkens&oldid=349237"