Gé Reinders

Van Wikipedia
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Remunjs, es te dit dialek sjpriks.

Gé Reinders (lènks) naeve Tessa International, es vakjurylid biej 't Nationaal COC Songfestival 2008.

Gé Reinders (Leeve (Remunj), 12 september 1953) is eine Nederlandjse zanger, musicus en sjriever. Hae is veural bekènd door zien leedjes in ’t Leeves plat. Ziene mezieksjtiel wirt gekènmerk door lange zinne en ein sjtömgeluud dat in Limburg ouch waal 'n "meeksjtöm" (huilstem) geneump wirt.

Reinders greujde op in Limburg, mer woort mede gevörmp door ein verblief van twelf maondj op zevetieënjaorige laeftied in de Verenigde Sjtate.

Meziek[bewirk | brón bewèrke]

Gé Reinders in 2008

Hae sjpeelde vanaaf 1973 in de Remunjse bands Zimmerman en Girls Walk By. Hae hej daomit raejelik väöl succes, mer ech groate bekèndheid kroog hae pas in de jaore tachtig, wiej hae in 't Limburgs begoosj te sjrieve en te zènge. In 1986 sjtónd hae zelfs, es winnaer van de Limburgse pries Noe of Noats es äöpeningsact op Pinkpop in Gelaen.

Zien zudelike geënte meziek vónj ouch boete Limburg geheuër. De cd's As 't d'r op aan kump (1994) en Truuk nao aaf (1995) woorte louvend besjpraoke in de lanjelikke pers. Vanaaf 1996 richde hae zich op de theaters, die hae veraoverde mèt intiem zangoptraejes.

Reinders wirkde ein aantal keëre same mèt Toon Hermans en ouch mèt Lenette van Dongen (cd Jagadamba). In 1999 kaom zien veerde Limburgstalige cd oet: D'n Haof. Hiejop sjteit 't melancholieke nummer Blaosmeziek, woveur Reinders de fanfaar Eendracht Nieuwenhagerheide leet opdrave.

Die lien trok Reinders in 2005 door mèt de cd Blaos mich nao hoes, ein samewirking mèt vieftieën blaosorkeste oet Limburg. In 't veurjaor van 2007 trooj Gé Reinders mèt 't programma Blaos mich nao hoes op mèt Symfonisch Blaosorkes ATH in Paradiso, Amsterdam.

In september 2007 kaom 't vervolg op de cd Blaos mich nao hoes oet: Blaos mich ’t landj door. Dit nuuj album woort opgenómme mèt 12 Nederlandjse blaosorkeste, oet jeder provincie ein. Jeder leedje woort door ein anger korps oetgeveurd. D'r sjpele in totaal zoa'n zevehónderd muzekante op de cd mit. Veur dees cd óntving Gé Reinders in 2008 de Edison Music Award in de categorie waereldmeziek.

Gé Reinders sjteit saer 2003 in de Top 2000 mèt ziene hit Bloasmeziek. Van plaatsj 261 in 2004 sjtóng 't nummer in 2007 al op nummer 27 (nao jaore daoveur op nummer 67 & 167 te höbbe gesjtaon).

Gé geuf geregeld workshops en masterclasses in theaters in Nederlandj wo-in zien aandach veural oetgeit nao de taalkuns. De naodrök ligk dan veurnamelik op riemproblematiek en zoagenaamde woordaccente. Dèkser zènge de sjtudente dan aafsjlutend nog ein meërsjtömmig leedje mèt häöm.

Proza[bewirk | brón bewèrke]

Gé Reinders en Huub Stapel biej de presentatie van Het Zakdoekje

In september 2010 versjeen biej Nijgh & Van Ditmar Het zakdoekje, ein book van Gé Reinders wo-in hae zien zeuktoch nao ’t verzètsverlaeje van zien moder in de aorlog besjrief.

Theater[bewirk | brón bewèrke]

Eindj september 2010 begint Gé mèt Lucas Beukers op de basse en Pieter Klaassen op de euverige sjnare aan de nuje tour Helden.

Trivia[bewirk | brón bewèrke]

  • Aopebaar-verveurbedrief Veolia verneumde ein van zien Velios-treine nao Reinders.[1]
  • In Limburg is eine tendens waarnumbaar óm kènjer op te voede in 't ABN. Ouch Gé Reinders voed zien eige kèndj in 't Nederlands op zoa leët hae in ein interview in de Volkskrant weite.

Externe link[bewirk | brón bewèrke]

Referenties[bewirk | brón bewèrke]

  1. Veolia heeft nog wel dertig namen voorradig. De Gelderlander, 21 november 2007.
Commons
Commons
In de categorie Gé Reinders van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Gé_Reinders&oldid=380092"