G'n Dreesj

Van Wikipedia

Dit artikel is gesjreve (of begós) in 't Nuts. Laes hie wie v'r mit de versjillende saorte Limburgs ómgaon.


Mergele haoëf mèt vakwerksjuur G'n Dreesj

G'n Dreesj is d'r naam van 'ne typisch Limburgse haoëf, gans alleën gelaeëge aan d'r Bergerwaeëg, tösje Tersjtraote, Griëzegröbbe, Nirve en Tervoeësj in de gemeënte Baekdale in Zuud Limburg. 't Driehoëkig sjtök land, woeë-op dees boerderiej sjteet, hèt aoch G'n Dreesj. De Pletsjbaek, 'n ziebaeëk va de Gelaenbaek, sjtruimp langszieë. In de buurt laoëpe hol waeëg. Eine toegangswaeëeg hat d'r naam Driesenweg.

De gesjlaoëte carréboerderie, saeër de jaore 30 van de 20e ieëw egendóm va de familie Jaokobs, is opgetrokke in mergel (aan d'r boeëtekant) en baksjteën (sjuur en sjtel) aan d'r binneplei en datiert oet d'r 18e ieëw. Baoëve de ingangspaoërt is 'n jaoërtal oetgekap woeë-op de lèttersj anno MM en 't jaoërtal 1733 sjtaoën. In d'r tuup van d'r rechtergaeëvel sjteet gebeiteld: RK MM 1732. De aanligkende sjuur is i vakwerk opgetrokke. 't Is nog ummer 'ne boerebedrieëf.

't Woerd dreesj betekent aoch, braakland, óntgonne (geploogde) plek, dèks land in 'n driehoëkige vörm. Veldname mèt Dreesj of dries zunt op mieë plaatse te vinge. bv in Valkeberg vuur de rewien, 'ne ouwe naam in Brokem (galgendries), bie Sjlenake en bie Hommerig in Belsj.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=G%27n_Dreesj&oldid=431292"