Frère Roger

Van Wikipedia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Frère Roger in 1991

Roger Louis Schütz-Marsauche (Provence (Zjwitserland) 12 mei 1915Taizé 16 augustus 2005), beter bekènd es Frère Roger, waor de opriechter en prior van de oecumenische kloastergemeinsjap van Taizé (Communauté de Taizé).

Frère Roger woort gebore es neugende kind van Karl Ulrich Schütz, 'ne protestantse pastor oet 't Zjwitserse Zürcher Unterland, en Amélie Henriette Schütz-Marsauche, die oet Bourgondië kaom. Van 1937 bies 1940 sjtudeerde Roger gereformeerde theologie in Sjtraatsburg en Lausanne. In augustus 1940 fietsde hae vanoet Zjwitserland nao Taizé, e plaetske in de Bourgogne, vlak bie Mâcon. Frankriek waor doe door de Pruusje bezat. In Taizé hoesvesde hae same mèt zien zuuster Geneviève en e paar vrung vluchtelinge, veural Juudde. Nao d'n oorlog zörgde hae veur oorlogsweze, meh ouch veur Duutsje kriegsgevangene.

In 1949 sjtiechde hae de Communauté de Taizé, 'n oecumenische kloasterorde. Op 17 april van dat jaor lagte de ièrsjte zeve broedersj de gelofte aaf. Oorsjprunkelik waore allein protestante lid van de orde, meh later kaome dao ouch roams-katholieke en oasters-orthodoxe bie.

In 1974 organiseerde de Taizégemeinsjap e concilie, dat Taizé waereldberoemp maakde. Vanaaf daen tied woort de paus door Frère Roger es "universele pastor" erkènd. D'r kómme tegewoordig jaorliks tièndoezende jong luuj nao Taizé. De gemeinsjap riech ziech op de verzeuning van de gesjeije christelike kèrke en vink dat alle christene in vrae same moete kènne kómme.

Op 16 augustus 2005 woort Frère Roger bie 't aovendgebed in Taizé, woabie óngevaer 2500 jongere aanwezig waore, door Luminiţa Solcan, 'n 35-jaorige Roemeense, mèt e mets neergesjtoke, mèt de doad tot gevolg. Ziene opvolger es prior ies Frère Alois, dae door Roger zelf daotoe beneump ies.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Frère_Roger&oldid=433880"