Dietrich Fischer-Dieskau

Van Wikipedia
Gank nao: navigatie, zeuke

Dietrich Fischer-Dieskau (Berlien, 28 mei 1925 - Berg, 18 mei 2012) waor 'ne Duutsje zenger. Fischer-Dieskau goldj es eine van de belangriekste zengers van de late twintigste ieëw. Zien opnames van de Schubertlieder beheure volges kinners toet de sjoonste opnames van die wirke en höbbe väol biegedrage aan de 'rivival' van die sjtökker. Boetedet is Fischer-Dieskau mit meer es 400 versjillende plaatopnames eine van de mees opgenomme (klassieke) musici ooit.

Fischer-Dieskau zóng bariton. Wiewaal er dus 'n leeg mannesjtum hauw, hauw 'r gein 'donker' sjtum. Fischer-Dieskau is ummer dudelik te herkinne aan de helder, 'sjtraolende' baovetone die altied in zien zank te ongersjeije zeen.

Biografie[bewirk | brontekst bewerken]

Fischer-Dieskau kwaam oet 'n femilie mit 'n lang muzikaal traditie. De Bauernkantate (BWV 212) waerde door Bach al aan eine van Fischer-Dieskaus väorvadere (Kammerherr Carl Heinrich von Dieskau) gewied. Ziene opa woor musicoloog; zien aojers sjtimuleerde 't talent van häor zoon al vreug.

Nao de aorlog kwaam Fischer-Dieskau in kreegsgevangesjap in Italië, wo d'r zien zanksjtudie autodidaktisch doorzat. Zien eejste optraeje goof d'r in zien Amerikaans krijgsgevangenekamp in Italië.

Zien carrière begòs serjeus in jannewarie 1948 wie d'r - nog altied mezieksjtudent - de cyclus Die Winterreise van Schubert aan de radio zòng. In detzelfde jaor verbondj 'r zich aan de Städtische Oper Berlin. In 1949 maakde hae zien eesjte plaatopname: de Vier Ernste Gesänge van Brahms. Ouch haaj er in det jaor gastrolle in de operahoezer van München en Wene. Wiejer mielpäöl: in 1951 de Lieder eines fahrenden Gesellen van Mahler bij de Salzburger Festspiele mit Wilhelm Furtwängler es dirizjent en zie debuut op het festival van Edinburgh in 'tzelfde jaor. In 1952 maakde Fischer-Dieskau zien eerste tournee in de Verenigde Sjtaote. In 1954 trooj 'r de eejste keer op bie de Bayreuther Festspiele es Wolfram in Tannhäuser.

In 1949 trouwde Fischer-Dieskau mit celliste Irmgard Poppen. Zie sjtòrf in 1963 bie de gebaorte van häor derde zoon. Daonao waas hae kort mit de actrice Ruth Leuwerik getrouwd. Allewiel is Fischer-Dieskau mit de zengeres Julia Varady getrouwd.

Saer 1983 waor Dietrich Fischer-Dieskau professor aan de Hochschule der Künste in Berlien. In 1993 sjeijde d'r oet mit zinge.

In 2005 kreeg 'r de Polar Music Prize.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Dietrich_Fischer-Dieskau&oldid=349073"