De Geraniejums

Dit artikel is gesjreve (of begós) in 't Ruivers. Laes hie wie v'r mit de versjillende saorte Limburgs ómgaon.

---

De Geraniejums is de naam van 'ne Venlose kolder- en dialekgroep. De naam Geraniejums is óntsjtaon door 't feit det de drie oprichters met de veurname alle drie met ein G beginne: Ger, Ger en Geert dus Ger-aniej-mich Ger-aniej-dich en Ger-aniej-um. De Geraniejums is ein trio wat humoristische leedjes zingk in 't Venlose dialek, aafgewisseld met hilarische sketches, wao-in dudelik de twieësjtried tösse Venlo en Tegele wúúrt oetgebeeld, zoeë-as det vrúúger en soms ouch heden ten dage nog sjpeelt in hielvúúl plaatse.

Dit trio is opgericht in 1997 door Ger Geerlings oet Ruiver en hoot in ierste instantie Ger en de Geraniejums, waat later is verangerd in gewúún de Geraniejums. De hiere Ger Geerlings oet Ruiver, Geert Thissen oet Tegele, en Ger van Enckevort oet Zjwame vormde de Geraniejums die in ierste instantie nao 30 jaor same in bandjes te hebbe gespeeld, 't genóg vónje om idders kier maar weer met die groeëte versjterkers te sjleipe, en sjmorges in alle vruugte thoes te komme. Maar al nao ein maondj det ze met die bandjes ware oetgesjeid, kroop 't muzikale blood dao wao 't neet gaon kós en kwame de drie hiere weer biejein met 't plan om get angers te gaon doon, 't mós iets zien met klein versjterkers en ein klein drumsjtelke wat vlot opgebouwd en aafgebraoke kós waere.

't Ierste idee waas om nummers oet de jaore '50 en '60 te gaon sjpele, om percies te zien die van Anneke Grönlo en van Peter Kraus en Conny Fröboes. Maar nao ein paar kier repetere kwaam Ger Geerlings al flot met kolderieke Limburgse tekste veur dees nummers, die zoeë-as later bleek good aansjloge bie 't publiek.

Lede

• Ger Geerlings: gebaore op 6 augustus 1950 oppe Ruiver. Hae sjting al met 12 jaor op de bühne en vaanaf toen sjreef hae ouch tekste, woebie hae altied vúúl same haet gewerk met ziene naef en waordkunstenaer Arnold Wassen, zoeë troje ze dökker same op as d'r weer eine in de femielie 25 of 40 jaor bie de Hermenie waas, maar ouch op broëlofte en angere fieësjes. Twelf jaor lang sjreve ze same tekste en liedjes veur de Ruiverse revue en ging 't op de leedjesaovende dök wae met de ierste plaats ging loupe. Vúúl nummers van Ger Geerlings zien opgenaome biej Studio de Karelhoeve van Jan Theelen in Munstergelaen. Same zote ze in de femiliekepel van An en Nel, dit waas ein kepel met allemaol naeve en nichte en dao ouch nog de kinjer van. Van de femilies Geerlings en Wassen wao idder mannelik lid van bie de harmonie waas, waovan de femilie Geerlings d'r ach haaj en de femilie Wassen veer. Dao naevebiej zoot Ger Geerlings 15 jaor biej 't windjbuujel-kwartet waat jaorliks de gemeintepolitiek en van alles wat in Ruiver gebeurde op de korrel noom. Vanaaf zien twelfde jaor zoot hae in versjillende vereiniginge, scouting Lambertus, philharmonisch gezelschap Reuver, gymnastiek vereiniging Hercules en Judoclub Reuver. Maar ouch haet Geerlings in hiel get coverbands gesjpeeld, inkel veurbeelde zien The Facts, Les Brigands, Uncle Barbers blues band, Point Omega, Sandwich, The Melodie strings, The Volumes, The maybugs, Stage Company. Wiejer waor hae invaller bie Daylight en momenteel biej De Geraniejums.

• Ger van Enckevort: gebaore op 2 september 1948 te Venlo. Ouch Ger van Enckevort zoot al vreug in de muziek, in 1962 haaj d'r met zienen broor Frits van Enckevort zienen iersten band De Locomotions. Dees band waerde in 1966 opgeheve. Ger haet toen 10 jaor neet mier in bands gesjpeeld, maar is zich mier en mier gaon toelegge in 't opnimme van muziek. In 1976 is hae gestart met de band Daylight, dizze band haet maar leefs 21 jaor bestaon, dao naevebiej haaj Ger inmiddels ein eige opnamestudio in Bezel (studio Walsberg). Naodet de band Daylight in 1997 waerde opgeheve is Ger van Enckevort same met Ger Geerlings en Geert Thissen de Geraniejums begós. Op 6 augustus 2006 is Ger van Enckevort op 58-jaörige laeftied plotseling euverleje, met eine volle agenda en in euverleg met de femilie van Ger is besjlaote om ein nie lid bie de Geraniejums te zeuke.

• Geert Thissen: gebaore op 13 augustus 1951 te Tegele. Ouch dit waas eine vreuge muzikant. Hae sjpeelde in Emmily Freud, The Maybugs, stage company, stage Avanties, daylight, De Geraniejums wie hae 14 jaor waas. De Geraniejums höbbe in 2004 ein theatertour gedaon met Tilly Maessen, Thei Dolls en Marc Hermans, in de Waolse Medammekoer on tour, wat opgenaome woort door L1. In 2005 deje de Geraniejums ein theatertour met 't Limburgs Symphonie Orkest (LSO). Hievan zien filmopnames gemaak door de bekende natuurfilmer Maurice Nijsten. De Geraniejums zien óngersjeie bie de Mestreechse Tempeleers met de Gouwe Pitsjtang.

• Jos Roulaux, gebaore 19 november 1968 in Venlo, is in oktoeëber 2006 as vervanger van de euverleje Ger van Enckevort bie de Geraniejums gekómme. Jos, dae muzikant in hert en nere is, wis zich al binne inkele repetities good te veuge bie zien twieë ajere collega's. Jos is in versjillende coverbandjes drummer gewaes en 't kosde um den ouch weinig meujte om de rol van derde Geraniejum op zich te nimme.

Op 4 fibberwarie 2009 promovere de Geraniejums aan de N.U.L. (Narre Universiteit Limburg). Tiedens dit gebeure is ouch Ger van Enckevort posthuum gepromoveerd. De Geraniejums höbbe in de loup der jaore versjillende cd's oetgebrach en op 26 april det jaor waerde d'r ter gelaegeheid van 't 12,5-jaörig bestaon ein dvd/cd-album oetgebrach.

Externe link

de Geraniejums besjikke euver ein eige website: https://web.archive.org/web/20141219192427/http://www.geraniejums.nl/)