City Polo Mestreech

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Toernooj vaan 2016

City Polo Mestreech (officieel City Polo Maastricht) is e polo-toernooj wat in miert 2013 veur 't iers is gehawwe op de Vriethof in de Mestreechse Binnestad. Nao 't succes vaan de ierste oetgaaf besloot de organisatie 't evenemint te doen trökkiere.[1][2] In 2017 góng 't evels neet door. In 2018 weurt 't wel gehawwe, meh neet mie op de Vriethof.[3]

Aonloup[bewirk | brón bewèrke]

't Idee um in Mestreech e polo-evenemint te organisere kaom vaan de zakemaan Ben Vos. Oersprunkelek waor de ierste oetveuring vaan City Polo gepland veur 2012. Dit góng toen neet door umtot me geinen hoofsponsor kós vinde.[4]

't Jaor dao-op lökden 't evels wel. De organisatie heet oetgemaak tot 't evenemint in 't lèste weekind vaan d'n TEFAF moot valle (in 2013: 22 t/m 24 miert). Gemeinelek heers tege 't ind vaan die kunsbeurs liegconjunctuur; me hoop de bezeukers daan nao City Polo te kinne trèkke.[5]

Opzat[bewirk | brón bewèrke]

De vörm vaan polo dee me op dit toernooj bedrijf weurt arenapolo geneump. Dit versjèlt sterk vaan reguliere polo. Me späölt in 'nen arena (vaan zand) in plaots vaan op e veld, en dewijl e gemein poloveld 274 bij 176 meter mèt,[6] is 'ne polo-arena mer 40 bij 60 meter groet. Wijer bestoon de teams oet twie speulers in plaots vaan veer. Arenapolo is bedach um speulers in 't wintersezoen sjerp te hawwe.[7]

Veur 't toernooj woorte veer teams samegestèld, mèt speulers oet binne- en boeteland. Op de vriedag weurt nog neet gespäöld. Op de zaoterdag speule ze 'ne round robin (dat wèlt zègke: alle veer eine kier tegenein). Op de zondag speule de teams daan de haaf finales en finale. Boete de VIP-tent zien de wèdstrijde vrij touwgenkelek.[8] Roontelum 't eigelek toernooj weure allemaol versjèllende activiteite gehawwe, in 2014 oonder mie demonstraties ponyvoetbal en horseball.[9]

De peerd - zoe'n daarteg totaol, um ze neet al te väöl te vermeuje - woorte gestald in de Vriethofgaraasj; dit waor oonderdeil vaan 't sponsorcontrak mèt exploitant Q-Park.[10] In 2016 woorte ze in de Tapijnkazèrn gezat.

Verloup[bewirk | brón bewèrke]

't Toernooj woort gehawwe bij maoteg weer en te lieg temperature veur d'n tied vaan 't jaor; dao-op gelèt veel de opkoms mèt.[11]

In augustus 2016 kaom veurzitter Ben Vos oonder verdinking vaan fraude.[12] De vijfde editie, die zouw mote weure gehawwe in miert 2017, woort oetindelek oetgestèld tot 2018.[13]

Winners[bewirk | brón bewèrke]

2013

Team Mercedes-Benz[14] (Chris Hyde en Martijn van Scherpenzeel)[8]

2014

Team Scapa/Vos[15] (Michael Redding en Clément Delfosse)[16]

2015

Team Scapa (Clément Delfosse en Michael Redding)

2016

Team Scapa (Clément Delfosse en ... Souren)

Rifferenties[bewirk | brón bewèrke]

  1. City Polo Maastricht - Home
  2. Dagblad De Limburger - Vrijthof voor even polo-arena
  3. RTV Maastricht - City polo op evenementenlijst
  4. Dagblad De Limburger - Geen polo op Vrijthof in 2012
  5. Dagblad De Limburger - Polotoernooi op Vrijthof Maastricht gaat door
  6. Sportpolo.com - Polo field
  7. City Polo Maastricht - Over polo
  8. 8,0 8,1 City Polo Maastricht - Wedstrijden/Event
  9. City Polo Maastricht - Programma 2014
  10. Bokt.nl - Vrijthofgarage doet tijdelijk dienst als paardenstalling
  11. Maastricht Aktueel - Drie dagen City Polo Maastricht in beeld
  12. 1Limburg - City Polo Maastricht wacht onderzoek vastgoedbaas af
  13. City Polo Maastricht - 5e editie City Polo
  14. Demo Productions - City Polo Maastricht
  15. City Polo Maastricht - Archief 2014
  16. Citypolo

Extern links[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=City_Polo_Mestreech&oldid=456353"