Bussum

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Ligking vaan Bussum in Noord-Holland

Bussum is e versteidelek dörp en 'n gemeinte in de Nederlandse provincie Noord-Holland, in 't Gooi, mèt (1 juli 2006) 31.273 inwoeners en 'n oppervlak vaan 8,10 km2 (daovaan 0,06 km2 water). Heidoor is Bussum 'n sterk steideleke, diechbevolkde gemeinte. Binne Bussum ligke gein ander kerne, meh wel e deil vaan de naobersjap Crailo.

Gemeinteleke functies[bewirk | brontekst bewerken]

De meiste inwoeners zien forense die in Hilversum of Amsterdam wèrke. De televisiestudio's, die vreuger in Bussum gevesteg waore, zien allaank nao 't Mediapark in Hilversum verhuis. In de gemeinte stoon drei middelbaar sjaole, die door lierlinge tot boete 't Gooi bezoch weure. Wijers ligk Kamp Crailo, e militair exercitieterrein, binne de gemeintegrenze.

Aongeziech[bewirk | brontekst bewerken]

Bussum heet zie dörps aongeziech bekaans gans verlore; 't is gooddeils e villadörp. E belangriek monumint is de neogotische Vituskèrk in 't dörpscentrum oet 1884, nao 'n oontwerp vaan Pierre Cuypers. Westelek vaan 't centrum ligk Het Spieghel, 'ne villawiek dee tösse oongeveer 1870 en 1940 is oontstande en tot de ajdste in zien soort huurt. Oostelek daovaan vint me 't Brediuskwartier, e tuindörp mèt ouch hoezer veur rieker lui. Allebei de wieke zien intösse besjermp dörpsgeziech.[1] Te zuie ligk de nao-oorlogse wiek Bussum-Zuid.

In 't noorde slut de bebouwing direk aon op Naarden, in 't zuie evels neet direk op Hilversum. Dao vint me 't heigebeed De Franse Kamp.

Historie[bewirk | brontekst bewerken]

't Gooi, wat hoeg ligk en bij 'n euverstruiming neet oonder water löp, is ein vaan de ajdste bewoende gebeje vaan Nederland. De vreug historie vaan Bussum liekent sterk op die vaan Hilversum. De plaots, boevaan de naom te verklaore vèlt es bos-heim, is roond 't jaor 1000 oontstande. 't Belaankriekste middel vaan bestoon waor de sjaophawwerij, umtot d'n erme groond neet te väöl akkerbouw permeteert. Later weurt Bussum belaankrieker es textielcentrum (spinne en weve). Aonvenkelek is de plaots bezit vaan Naarden; later in de middeliewe weurt 't dörp zelfstendeg.

In 1874 kump de spoorlijn vaan Amsterdam nao Hilversum veerdeg. Bussum, wat mèt Naarden 'n statie deilt, kump noe oet zien isolemint, en väöl rieke Amsterdammers vestege ziech in dees rustieke umgeving. Heidoor greujt 't dörp snel. Behave de welgestèlde vestege ziech hei ouch väöl kunstenere, in de ierste plaots sjrievers. Frederik van Eeden riechde hei de kolonie Walden op, en mèt-tachtegers Herman Gorter en Willem Kloos kaome ouch in Bussum woene. In d'n Ierste Wereldoorlog naom Bussum mier es 1000 Belzje vlöchtelinge op. Vaanaof 1951 voonte hei de televisie-oetzendinge plaots, die intösse nao Hilversum verplaots zien (zuug bove). In recinte tije heet de gemeinte te make mèt 'n sterke vergriezing door 't nao-oorlogs forensisme. Sinds inkel jaore weurt de discussie geveurd euver herindeiling: de provincie wèlt vaan Naarden, Bussum, Muiden en Weesp ein gemeinte make, Bussum zelf wèlt allein same mèt Naarden.

Referenties[bewirk | brontekst bewerken]

  1. Besjermde stads- en dörpsgeziechter in Nederland

Externe link[bewirk | brontekst bewerken]

Provincie Noord-Holland

Aalsmeer | Alkmaar | Amstelveen | Amsterdam | Beemster | Bergen | Beverwijk | Blaricum | Bloemendaal | Bussum | Castricum | Den Helder | Diemen | Drechterland | Edam-Volendam | Enkhuizen | Graft-De Rijp | Haarlem | Haarlemmerliede en Spaarnwoude | Haarlemmermeer | Heemskerk | Heemstede | Heerhugowaard | Heiloo | Hilversum | Hollands Kroon | Hoorn | Huizen | Koggenland | Landsmeer | Langedijk | Laren | Medemblik | Muiden | Naarden | Oostzaan | Opmeer | Ouder-Amstel | Purmerend | Schagen | Schermer | Stede Broec | Texel | Uitgeest | Uithoorn | Velsen | Waterland | Weesp | Wijdemeren | Wormerland | Zaanstad | Zandvoort | Zeevang

Opgeheve gemeintes

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Bussum&oldid=351821"