Bung

Dit artikel is gesjreve in 't Bungs. 't Weurt gewaardeerd óm in dit artikel 't Bungs aan te hauwe of aan te gaeve welk anger dialek gebroek is.

---

Bung: de aw Agneskèrk

Bung (Nederlands Bunde) is 'n kern bie de Geul en 't Julianakanaal in de gemeinte Meersje in Nederlands Limburg. Tot 1982 waor 't 'n zelfsjtandige gemeinte. In vreuger jaore ouch waal Bundt, Bunn, Bunna (Latien), Buonde en Bonde geneump. In 2002 haet Bung 5868 inwonersj.

Buurtsjappe

De gehuchte en buurtsjappe

• Kaze (Kasen)
• 't Voelwames (Voulwames)

Bezeenswaerdig

• De nuu kèrk van Bung, die in 1960 is geboed in plaats van de aw St. Agneskèrk, in Maaslandse barok, is ouch gewied aan de heilige Agnes, de patrones van kuisheid, kinger van Maria, maagde en tuinmanne. Ze is oontworpe door de architekte Fanchamps en Van der Pluym. De kruusweegsjtasies woorte gemaak door de Limburgse kunstenaer Martin Linnartz. De Glaas-in-betonvinsters zin van de Bunger kunstenaer Daan Wildschut. Wiejer sjteit 'r 'n Maaslands Madonnabeeld, dat vermoedelik oet de 14e ièw sjtamp. 't Beeld van de Heilige Agnes aan d'n ingank is van de Bunger kunstenaer Rob Stultiens.
• De aw kèrk, oet 1828, woort nao 1960 gebruuk es constructiewèrkplaats en is sinds 1993 in gebruuk es cultureel centrum de Aw Kèrk.
• Aan de Geulsjtraot in Bung lik 'ne hièrehoof oet de 18e ièw, Rustenburg. 't Hoes sjtamp oet 1767 en d'n hoof is geboed in 1654 in Maaslandse renaissancesjteil .
• Aan de Heiligenbergsjtraot sjteit Hoes Heiligenberg, ouch oet de 18e ièw, geboed van baksjtein mèt op de heuk mergelblokke.
  
• De Bungerbosj is de sjtijlste hellingbosj van Nederland mèt huègdeversjille tot 80 maeter. Dizze bosj haet 'n unieke natuurhistorische waerde, want 't is d'n einigste bergbeekbosj van Nederland. Vaöl versjillende flora, wie Aronskelk, Annemoon en Kèrkesjleutel in de hol waeg, en fauna, oonder andere de vuursalamander, koome hie veur. 't Gebied is, wie gezag, riek aan bronne en beekskes.
  Mèt d'n aanlèk van 't sjpoor is de bosj euverlangs in tjwiè gedeiltes gesjplits. De vaöle beekskes zin via ei paar dukersj oonder 't sjpoor doorgeleid nao d'n andere kant, woa de beekskes vreuger e drassig gebied veroorzaakde aan de westelike kant van 't sjpoor, vreuger ouch bekind es De Binde (de beemden).
• Bung haet 'n sjtasie aan de sjpoorlien Mesjtreech-Zittert. 't Tegewoordig sjtationsgeboe is van 't type sjtandaard Douma.

In naovolging van Het Dorp (in Arnem) is in Bung de tjwiède woongemeinsjap veur lichamelik gehandicapte, Geuloord geboed. Ouch boete 't terrein van Geuloord zin noe woninge, woavan de bewoonersj oondersjteund weure in 't kader van "Begeleid Zelfsjtandig Wone".