Betsehaove

Dit artikel is gesjreve (of begós) in 't Wieldesj. Laes hie wie v'r mit de versjillende saorte Limburgs ómgaon.

---

Vakwerk mèt pannegevel

Betsehaove of Baetsehaove (Nederlands: Beertsenhoven) is 'n buurtsjap van Wielder (Wijlre) in de gemèngte Gölpe-Wittem in Zuid Limburg.

De vief hoezer en häöf liegke langs de gelieknamige Baetsehaoverwaeg waeg tösje Sjtokkem en Gölpe. In 1840 woeëdt 't Beritzenhoven geneumd en woeënde d'r zieëve gezinne mit tezame vieftig luuj. In 2009 woeëne d'r nog zestieën.

Bezeenswaedig is 'n vakwerk-boerderie mit 'nne pas gerestaureerde roewe pannegieëvel, gelaege aan d'r voot van d'r Dolsberg, woeëop 'ne flora-rieke hellingbösj liegkt mit Orchideeë. Naeve dat hoes sjteit 'n ieuwe-aw den. Mit 'ne pleij dae awt gelaote is, dae vlak naeve d'r waeg liekt zónger hèk of breer.

Midde in 't gehuch sjteit ei gesjmeed iezere veldkruuts van vuuër 1870, misjien ei examesjtök van 'ne lierling-sjmid. De toegangswaeg zunt mieëstal ónverharde waeg (gröbbe en grachte, de zoeëgeneumde haol waeg). Op minder es hónderd meter van de hoezer zunt 'n tieëntal brónne en brönnekes woeë water gehóld woeëdt vuuër 't hoeshawte en 't vieë. Later waore in Baetsehaove zieëve gegrave pötte, vief mit 'n pómp en twieë mit ei óphaol-mekaniek in ei pöthuuske.